Embætti landlæknis hefur fellt niður starfsleyfi sex lækna og takmarkað starfsleyfi þess sjöunda eftir athugun á málum 13 lækna. Málin komu til skoðunar eftir að Heimildin óskaði upplýsinga frá embættinu í tengslum við alþjóðlega rannsókn á læknum sem höfðu misst starfsleyfi í einu landi en héldu því í öðru.

Í sjö af þeim 13 málum sem tekin voru til skoðunar taldi embættið tilefni til aðgerða. Sex starfsleyfi voru felld niður en eitt takmarkað.

Rannsóknin, sem Heimildin tók þátt í ásamt OCCRP, The Times, VG og fleiri fjölmiðlum, leiddi meðal annars í ljós sex staðfest dæmi um lækna sem höfðu gilt starfsleyfi á Íslandi þrátt fyrir að hafa verið bannað að starfa annars staðar.

Landlæknir segir að enginn læknanna sjö hafi verið við störf hér á landi þegar ábendingarnar bárust. Fyrri rannsókn Heimildarinnar sýndi þó að minnst tveir læknar höfðu starfað hér eftir að hafa misst starfsleyfi erlendis.