Eyrún Anna Tryggvadóttir og Olga Helena Ólafsdóttir hafa ákveðið að stíga til hliðar eftir tíu ár sem eigendur BíumBíum og Von verslunar. Nýir aðilar hafa tekið við rekstrinum en þær munu þó áfram koma að starfseminni að einhverju leyti.
Olga greinir frá tímamótunum í færslu á Facebook og segir miklar breytingar fram undan. Hún lítur jafnframt yfir farinn veg og segir þær stöllur hafa byggt fyrirtækin upp á síðasta áratug, flutt starfsemina ítrekað, kynnt fjölmörg ný vörumerki til sögunnar og aukið vöruúrvalið verulega.
Upphafið má rekja til Minningarbókar sem þær hönnuðu fyrir frumburði sína. Starfsemin vatt síðan upp á sig og meðal annars bættust við leikföng og fatnaður. Síðar keyptu þær BíumBíum, stofnuðu Pop markaði og sóttu vörusýningar erlendis.
Samhliða uppbyggingu fyrirtækjanna eignuðust þær báðar börn og segir Olga síðustu tíu ár hafa einkennst af miklu fjöri, fjölbreyttum verkefnum, áskorunum og álagi.
„Að hafa fengið að gera þetta allt saman með bestu vinkonu sinni sér við hlið er einfaldlega ómetanlegt,“ segir Olga.
Hún þakkar starfsfólki, birgjum, viðskiptavinum og fjölskyldum þeirra fyrir stuðninginn í gegnum árin og segir þær stoltar af því sem þær hafi byggt upp.
Þær Eyrún og Olga hverfa þó ekki alfarið frá BíumBíum og segir Olga þær áfram munu „vera með puttana“ í starfseminni. Nú taki hins vegar við nýr kafli og segist hún spennt fyrir nýjum tækifærum.
„Nú er bara að hafa opin augun fyrir nýjum tækifærum,“ segir Olga.
