Meðlimir hljómsveitarinnar Nýdanskrar hafa stofnað nýtt félag undir heitinu Himnasending sf., samkvæmt nýskráningu í hlutafélagaskrá. Tilgangur félagsins er listsköpun, tónlistarflutningur, útgáfa og skyld starfsemi.
Að félaginu standa Björn Jörundur Friðbjörnsson, Ólafur Hólm Einarsson, Stefán Hjörleifsson, Jón Ólafsson og Daníel Ágúst Haraldsson, en þeir eru allir þekktir fyrir áratugalangt starf sitt með Nýdanskri.
Stefán Hjörleifsson er stjórnarformaður félagsins en Ólafur Hólm Einarsson meðstjórnandi. Stefán fer jafnframt með prókúruumboð. Samkvæmt skráningunni rita allir félagsmenn firmað saman.
Nýdönsk á sér langa sögu í íslensku tónlistarlífi og hefur starfað frá níunda áratug síðustu aldar. Skráning hins nýja félags bendir til áframhaldandi starfsemi félaganna á sviði tónlistar, útgáfu og annarrar listsköpunar undir merkjum Himnasendingar.
