Uppboðshús sem sérhæfir sig í leikmunum úr kvikmyndum og sjónvarpsþáttum býður nú til sölu nashyrning sem notaður var í kvikmyndinni Ace Ventura: When Nature Calls.

Samkvæmt PropstoreAuction var leikmunurinn notaður í utanhússatriðum í gamanmyndinni frá 1995 þegar Ace Ventura, leikinn af Jim Carrey, notar vélræna nashyrninginn til að njósna um grunaðan mann.

Í einu frægasta atriði myndarinnar skríður Carrey út um afturenda nashyrningsins eftir að kælivifta inni í búningnum bilar. Vegna þessa hefur leikmunurinn fengið viðurnefnið „butt birth“-nashyrningurinn, eða „rassfæðingar“-nashyrningurinn.

Uppboðshúsið segir að sérstakt mynstur á skrúfboltum og staðsetning boraðra hola ofan á lúgu á hlið nashyrningsins passi nákvæmlega við atriðið þar sem Ace skríður út úr afturenda dýrsins. Háls og fætur nashyrningsins líta þó aðeins öðruvísi út í dag vegna viðgerða og nýrrar málningar sem framkvæmd var eftir tökur.

Leikmunurinn var áður til sýnis á Planet Hollywood.

Um miðjan dag á fimmtudag hafði hæsta boð náð 5.500 dollurum eða 692.340 krónur, en uppboðshúsið telur líklegt að verðið geti farið upp í allt að 8.000 dollara eða rétt rúmlega milljón krónur.

Tekið verður við boðum í nashyrninginn til 25. mars.

Hér fyrir neðan má sjá hið stórkostlega atriði: