Þingkona Sjálfstæðisflokksins, Hildur Sverrisdóttir, segir ríkisstjórnina ósamstiga og bendir á að frumvarp um bætur almannatryggingakerfisins hafi verið samþykkt þrátt fyrir athugasemdir fjármálaráðherra.
Kristrún Frostadóttir forsætisáðherra þvertekur fyrir staðhæfingu Hildar: Segir ríkisstjórnina afar stolta af frumvarpi sínu.
Hildur spurði Kristrúnu um skipulag ríkisstjórnarinnar í óundirbúnum fyrirspurnum á Alþingi fyrr í dag:
„Ríkisstjórninni er tíðrætt um að vera sérlega samstiga í öllum sínum störfum og er það vel. En það er nú reyndar svo að atvik síðustu vikna benda til þess að svo sé kannski alls ekki,“ sagði Hildur í samtali við mbl.is.
Daði Már Kristófersson fjármálaráðherra gerði nýlega miklar athugasemdir við frumvarp Ingu Sæland, félags- og húsnæðismálaráðherra, varðandi tengingu bóta almannatryggingakerfisins við launavísitölu í minnisblaði er fjármálaráðuneytið sendi velferðarnefnd:
„Það virðist vera ákveðið þema hjá þessari ríkisstjórn að hlusta ekki á þær faglegu athugasemdir sem berast um mál,“ sagði Hildur og bætti því við að það væri ekkert til sem kallaðist álit fjármálaráðuneytisins; allt sem kæmi úr þeirri átt væri í nafni sem og á ábyrgð fjármálaráðherra:
„Er hæstvirtur fjármálaráðherra hættur í þessari ríkisstjórn eða hafa hans sjónarmið ekkert vægi við ríkisstjórnarborðið, hið samhenta ríkisstjórnarborð?“ spurði hún í þinginu.
Forsætisráðherra kom þá í pontu og sagði að fyrirætlanir ríkisstjórnar væru þær að stöðva kjaragliðnun hópsins sem bæturnar ættu við. Hún sagði einnig að búið væri að fjármagna fyrirætlanirnar og því um pólitíska forgangsröðun hér að ræða. Kom fram í máli Kristrúnar að Daði hefði samþykkt frumvarpið og tekið fram að í minnisblaðinu væri helst verið að leggja áherslu á kostnaðinn sem aðgerðunum fylgdi. Það þyrfti að fjármagna fyrirætlanirnar og það er ríkisstjórnin að gera samkvæmt orðum Kristrúnar:
„Þessi ríkisstjórn er samstiga. Það liggur alveg fyrir. Þetta var samþykkt einróma út úr ríkisstjórn og við erum stolt af þessu frumvarpi.“
Hildur hélt áfram og benti á skoðanamun á milli Hönnu Katrínar Friðriksson atvinnuvegaráðherra og Sigurjóns Þórðarsonar, þingmanns Flokks fólksins, varðandi fjölda leyfilegra daga í strandveiðum.
Í frumvarpi atvinnuvegaráðherra kemur fram hvort skoða ætti að minnka leyfilegt magn á hverjum degi til að mæta fjölda daga:
„Hér er búið að dreifa þessu frumvarpi og ekki búið að leiðrétta þessi orð eða ekki búið að prenta það upp á nýtt eða dreifa aftur. Því er rétt að spyrja hæstvirtan forsætisráðherra, verkstjórann, hvort sé rétt. Kemur til greina að gera þessar breytingar? Hvor er að segja satt,“ spyr Hildur.
Að mati Kristrúnar segja báðir aðila satt og rétt frá og hún bættiþví svo við að atvinnuvegaráðherra hefði lýst því yfir að eigi stæði til að minnka daglegt magn:
„Það er ekkert óeðlilegt við nefndaryfirferð að alls konar valkostum sé velt upp, sérstaklega ef fólki finnst þetta vond hugmynd eða hefði viljað gera þetta með öðrum hætti en kemur fram í frumvarpinu.“
Að endingu sagði Kristrún ríkisstjórn sína standa á bak við frumvarpið; sagði vilja til staðar til að rýmka fyrir heimildum.
Komment