Lögregla hóf leit á HYBE, umboðsskrifstofu K-pop ofurstjarnanna BTS, á fimmtudag vegna meintra sviksamlegra viðskipta Bang Si-hyuk, stofnanda fyrirtækisins, að sögn rannsóknaraðila.

„Við erum að framkvæma húsleit og gera höfuðstöðvar HYBE í Yongsan-hverfi upptækar,“ sagði lögreglan í Seúl í stuttri yfirlýsingu.

Bang, höfuðpaurinn á bak við BTS, er til rannsóknar vegna ásakana um að hafa blekkt fyrstu fjárfesta til að græða ólöglega á frumútboði HYBE árið 2020.

Hann er sagður hafa hagnast um 200 milljarða von (um 17 milljarðar íslenskra króna) í því ferli, samkvæmt heimildum í suðurkóreskum fjölmiðlum.

HYBE hefur hafnað því að Bang hafi gert nokkuð ólöglegt.

„Við munum útskýra málið af fullri einlægni og sýna fram á að skráningin hafi farið fram í samræmi við öll lög og reglugerðir,“ sagði fyrirtækið í byrjun júlí og lofaði „virkri samvinnu“ við yfirvöld til að komast til botns í málinu.

Bang er sagður hafa blekkt fyrstu fjárfesta HYBE, sem áttu bréf fyrir hlutafjárútboð, með því að segja þeim árið 2019 að hann hefði engin áform um að skrá félagið á markað.

Hann hafi síðan hvatt þá til að selja hlutabréf sín til einkafjárfestingarsjóða þegar í raun var áætlun um útboð í vinnslu.

HYBE var síðan skráð á markað árið 2020, eftir að hluthafarnir höfðu selt eignarhluti sína.

Bang, sem er 52 ára, er sakaður um að hafa gert leynilegan samning við einkafjárfestingarsjóðina um að fá hluta af gróða þeirra þegar þeir seldu hlutabréf eftir útboðið.

BTS endurkoman árið 2026

Rannsóknin á sér stað á sama tíma og allir sjö meðlimir BTS klára skylduherþjónustu sína og undirbúa stóra endurkomu á næsta ári.

HYBE tilkynnti nú í júlí að ný plata og heimstónleikaferðalag séu á dagskrá árið 2026.

BTS er mest streymda hljómsveitin á Spotify og var fyrsta K-pop sveitin til að ná toppsætinu á bæði Billboard 200 og Billboard Artist 100 listunum í Bandaríkjunum.

Áður en þeir fóru í herinn, þénuðu BTS yfir 5,5 trilljóna von (um 485 milljarða króna) árlega í efnahagslegum áhrifum, samkvæmt rannsókn menningar- og ferðamálastofnun Kóreu.

Það samsvarar um það bil 0,2 prósentum af vergri landsframleiðslu Suður-Kóreu, samkvæmt opinberum gögnum.

Umræður höfðu átt sér stað um hvort BTS ætti að fá undanþágu frá herþjónustu, sem stundum er veitt til dæmis til Ólympíuverðlaunahafa eða klassískra listamanna sem vinna alþjóðleg verðlaun, en K-pop stjörnur falla ekki undir þau lög í Suður-Kóreu.

Vegna skorts á þjóðarsátt um málið ákváðu meðlimirnir að ganga í herinn hver í sínu lagi seint árið 2022.