Margrét Halla Hansdóttir Löf, sem ákærð er fyrir að hafa banað föður sínum og gert tilraun til að bana móður sinni á heimili fjölskyldunnar í Súlunesi í Garðabæ, neitar sök. Í skýrslutökum hjá lögreglu sagðist hún hafa verið í svefnherbergi sínu þegar hún heyrði dynk. Þegar hún kom fram sá hún föður sinn liggja á gólfinu og taldi hann hafa dottið. Hún kvaðst ekki vita hvernig móðir hennar hefði fengið áverka, en giskaði á að þau gætu stafað af fyrri föllum eða slysum. Mbl.is segir frá málinu.
Samkvæmt úrskurði Héraðsdóms Reykjaness, þar sem lögregla fór fram á áframhaldandi gæsluvarðhald, barst tilkynning um meðvitundarlausan mann á heimilinu. Þegar lögregla kom á vettvang lá maðurinn í anddyri hússins, meðvitundarlaus, á meðan eiginkona hans reyndi að aðstoða hann. Margrét stóð skammt frá. Reynt var endurlífgun, en maðurinn lést síðar sama dag. Bæði hjónin voru með mikla áverka og blóðslettur fundust víða um húsið, sem benti til átaka.
Lögregla telur að áverkarnir á manninum hafi að mestu verið af völdum annars einstaklings og að þeir hafi orðið til á mismunandi tímum og undir ólíkum kringumstæðum, meðal annars eftir högg, spark eða árekstra við harða fleti. Dánarorsök er ekki fullkomlega ljós, en ekkert bendir til þess að bráð veikindi hafi legið að baki.
Löng saga ofbeldis
Vitni hafa lýst því að Margrét hafi um langt skeið sýnt foreldrum sínum ofbeldishegðun, og gögn málsins sýna að þau hafi leitað læknisaðstoðar vegna heimilisofbeldis. Margrét sjálf kvaðst í yfirheyrslu hafa alist upp við ofbeldisástand á heimilinu.
Lögregla telur að móðir Margrétar, sem er lykilvitni í málinu, hafi búið við langvarandi ógnarástand og að Margrét hafi haft mikil áhrif á líf hennar. Því sé hætta á að hún reyni að hafa áhrif á vitni og rannsókn málsins ef hún fengi frelsi.
Héraðsdómur Reykjaness úrskurðaði Margréti áfram í gæsluvarðhald og Landsréttur staðfesti það. Hún hefur setið í haldi frá 13. apríl og gæsluvarðhaldið var síðast framlengt í lok júlí. Málið verður tekið fyrir í héraðsdómi í haust. Sonur hins látna, hálfbróðir Margrétar, krefst sex milljóna króna í miskabætur og að hún verði gerð arflaus. Móðirin krefst ekki bóta.
