Læknir sem Hödd Vilhjálmsdóttir, lögfræðingur og almannatengill, hefur sakað opinberlega um alvarlegt kynferðisofbeldi í nánu sambandi, hefur sent Mannlífi yfirlýsingu þar sem hann ber af sér sakir og boðar meiðyrðamál gegn Hödd. Hann segir hana hafa fært fram „viðurstyggilegar og glórulausar“ ásakanir á Facebook og nafngreint hann í því samhengi.
„Ég hef aldrei brotið á nokkrum einstaklingi – þvert á móti hef ég helgað mig því að aðstoða aðra,“ segir læknirinn, Hörður Ólafsson. Mannlíf sagði frá frásögnum Haddar í síðustu viku, en án þess að nafngreina lækninn.
„Ég heyrði af ásökunum hennar á meðan ég var í fríi erlendis en brást við strax með því að senda henni bréf þar sem henni var tilkynnt um að mál yrði höfðað til að ómerkja ummælin,“ segir hann í yfirlýsingu til Mannlífs.
Hödd sagði á Facebook-síðu sinni í gær að hún sé ekki aðeins tilbúin í meiðyrðamál heldur fagni því. „Meiðyrðamál flott … Tek fagnandi á móti því.“
„Ég veit ekki á hvaða vegferð Hödd er, en ásökunum hennar hafna ég með öllu,“ segir maðurinn ennfremur. „Ég hef aldrei brotið á nokkrum einstaklingi – þvert á móti hef ég helgað mig því að aðstoða aðra. Við Hödd áttum í nokkra mánaða sambandi sem hófst fyrir rúmum 15 árum síðan sem ég sleit um áramótin 2010/2011. Við hittumst einu sinni nokkrum mánuðum eftir að sambandi okkar lauk og skildum þá í góðu og síðan þá hef ég ekki haft nein samskipti við hana.“
Maðurinn boðar að hann muni stefna Hödd fyrir meiðyrði, dragi hún ekki staðhæfingar sínar um hann til baka. „Dragi Hödd ásakanir sínar til baka, og biðjist hún fyrirgefningar, mun ég fyrirgefa henni. Öðrum kosti sé ég mér ekki annað fært en að leita atbeina dómstóla eins og ég hef tilkynnt henni.“
Hödd greinir frá því á Facebook-síðu sinni í kvöld að hún hafi ekki fengið bréfið enn. Hún segist standa „gallhörð“ við færslu sína um manninn. „Hugarástand sjúkra einstaklinga leiðir þá oft út í horn. Eina sem þeir geta er að afneita en sannleikurinn mun að endingu sigra. Staðan er samt sú að ekkert bréf hefur mér borist. Líklega er gáfulegt að senda ekki hótanir um málaferli með bréfdúfum.“
Þá hefur DV greint frá því að eiginkona Harðar, Jórunn Frímannsdóttir hjúkrunarfræðingur og fyrrverandi borgarfulltrúi Sjálfstæðisflokksins, hefur blandað sér í málið með færslu á Facebook. Þar segist hún fullviss um Hödd muni tapa dómsmáli.
„Ég þekki Hörð vel og trúi því ekki að hann hafi nokkurn tíma beitt því ofbeldi sem hann er ásakaður um eða hafi þær kenndir sem látið er í veðri vaka. Með innihaldslausum ásökunum og án dóms og laga ákveður Hödd Vilhjálmsdóttir að setja á Facebook síðu sína ásakanir á hendur Herði sem hann þarf nú að verjast, eigi hann að halda sínu óflekkaða mannorði. Þetta gerir hún án þess að nokkur ákæra hafi verið lögð fram eða minnstu sannanir bornar á borð.“
