Mikil stemmning var í Landeyjahöfn í dag þegar ljósmyndara Mannlífs bar að garði. Þar mátti sjá gesti Þjóðhátíðarinnar í Vestmannaeyjum á leið sinni í Herjólfi en herlegheitin hefjast í kvöld.
Veðurspáin er hreint ekki góð víða um land en þó sérstaklega slæm í á Suður- og Vesturlandi. Lægð stefnir á landið með tilheyrandi hvassviðri en í Vestmannaeyjum gæti orðið ansi hvassasamt í kvöld og í nótt.
Mannlíf tók nokkra gesti tali og ræddi við þá um helgina.
Ertu spenntur fyrir þjóðhátíð?
„Ég er til í þetta! Þó svo að það verði rigning og vesen.”
Hefurðu farið áður?
„Nei þetta er í þriðja skiptið. Ég kom heim á hækjum síðast en ég ætla að sigra eyjuna í sumar.”
Með hverjum ertu að fara?
„Ég er að fara með nokkrum félögum, við erum sjö saman.”
Ertu að gista í tjaldi?
„Já, rent a tent.”
Hefurðu einhverjar áhyggjur af veðrinu?
„Nei, maður verður bara að díla við þetta. Dressa sig vel og rífa sig í gang.”
Mikael, Hektor og Arnaldur voru hressir.
Eruð spenntir fyrir þjóðhátíð?
„Já.”
Hafið þið farið áður?
„Já þetta er fjórða og þriðja skipti hjá okkur.”
Með hverjum eruð þið að fara?
„Við erum þrír hérna og svo eru tveir inni sem eru með okkur.”
Eruð þið að gista í tjaldi?
„Yes sir.”
Hafið þið einhverjar áhyggjur af veðrinu?
„Okkur líst ekkert allt of vel á þetta. En þetta er bara partur af þessu, við erum orðnir vanir og maður lærir með þessu.”
Hvað er það sem maður lærir?
„Halda svefnpokanum þurrum númer 1-2-3 og svo halda dýnunni þurri.”
Flóki og Árný munu gista í húsi ásamt 11 öðrum.
Eruð þið ekki spennt?
„Jú!”
Hafið þið mætt áður á Þjóðhátíð?
„Já, Hann hefur farið fjórum sinnum og ég (Árný) þrisvar.”
Með hverjum farið þið?
„Við erum 13 að fara saman.”
Og hvað, á að gista í tjaldi?
„Nei við verðum öll saman í húsi.”
Eruð þið ekki með neinn veðurkvíða?
„Nei, nei.”
Kjartan golfvallastarfsmaður og vinur hans Jakob sundlaugavörður eru mjög spenntir fyrir helginni.
Eruð þið ekki spenntir?
„Já, auðvitað. Spennan stigmagnast bara með líðandi stundu.”
Er þetta fyrsta Þjóðhátíðin ykkar?
„Já, við erum báðir að fara í fyrsta skipti.”
Hverjir fara með ykkur?
„Við erum að fara saman nokkrir strákar. Þeir eru á leiðinni núna.”
Og hvað, á að gista í tjaldi?
„Nei við erum heppnir og náðum að redda húsi.”
Eruð þið eitthvað smeykir við veðrið?
„Nei, nei, þetta verður bara stemming.”
Þau Elísabet Ýr, Jón Gunnar og Hafdís Lára eru að deyja úr spennu.
Eruð þið ekki spennt?
„Já, erum mjög spennt.”
Hafið þið mætt áður á Þjóðhátíð?
„Já og nei. Við fórum fyrir tíu árum en Elísabet hefur ekki farið áður.”
Og hvað kemur til?
„Tja bara 10 ár síðan.”
Á að gista í tjaldi?
„Nei við erum í Fellihýsi.”
Hafið þið miklar áhyggjur af storminum?
„Nei, við erum líka sveitafólk. Erum vön því að vera blaut og köld.”
