Lagt er til að sóknargjöld verði hækkuð um 200 milljónir króna á næsta ári samkvæmt fjárlagafrumvarpi ríkisstjórnarinnar. Jafnframt er gert ráð fyrir 75 milljóna króna viðbótarframlagi til húsfriðunarsjóðs vegna viðhalds friðaðra kirkjubygginga um land allt.
Með tillögunni er brugðist við áralöngu ákalli um hækkun sóknargjalda, en þau hafa verið lægri en sú reikniregla sem lög um sóknargjöld gera ráð fyrir.
Tillögurnar byggja á vinnu starfshóps sem skipaður var árið 2024 af þáverandi dómsmálaráðherra til að endurskoða fyrirkomulag sóknargjalda. Hópurinn kynnti ráðherra tillögur sínar í byrjun árs með það að markmiði að bregðast við viðvarandi niðurskurði sóknargjalda undanfarin ár.
„Þetta er mikið fagnaðarefni. Sóknargjöld standa undir mikilvægu starfi trúfélaga um land allt og það hefur lengi verið kallað eftir því að fjármögnunin verði styrkt og gerð fyrirsjáanlegri,“ segir Þorbjörg S. Gunnlaugsdóttir dómsmálaráðherra.
