Karlmaður hefur verið dæmdur í níu mánaða fangelsi í Héraðsdómi Reykjavíkur fyrir brot í nánu sambandi gegn fyrrverandi sambýliskonu sinni. Sex mánuðir refsingarinnar eru skilorðsbundnir til tveggja ára. Maðurinn var jafnframt dæmdur til að greiða konunni eina milljón króna í miskabætur.
Brotin áttu sér stað frá 24. mars til 11. júní síðastliðins. Samkvæmt dóminum raskaði maðurinn ítrekað og með alvarlegum hætti friðhelgi einkalífs konunnar og ólögráða barna hennar. Háttsemin fól meðal annars í sér líkamlegt og andlegt ofbeldi, hótanir, óvelkomin símtöl og skilaboð auk eftirfarar.
Í mars réðst maðurinn á konuna, tók hana kverkataki, hrinti henni í jörðina og hélt henni niðri. Hann tók hana síðan aftur kverkataki þannig að hún átti erfitt með andardrátt og beit hana í hönd.
Á næstu vikum sendi hann henni 90 óvelkomna tölvupósta, þar sem meðal annars komu fram alvarlegar hótanir. Hann hringdi jafnframt 48 óvelkomin símtöl í konuna. Í einum tölvupóstanna fylgdi myndband þar sem ljósmynd af konunni hafði verið komið fyrir á borði með kertum, hauskúpum og dulrænum táknum sem gáfu til kynna álaga- eða bölvunarathöfn.
Maðurinn var settur í sex mánaða nálgunarbann í maí en braut ítrekað gegn því. Meðal annars nálgaðist hann konuna á almannafæri, fór að heimili hennar og barna hennar og hafði samband við hana með ýmsum hætti. Hann lét einnig útbúa myndband með ljósmynd af henni þar sem óskað var eftir því að hún yrði fyrir langvarandi líkamlegum og andlegum þjáningum og dauða.
Maðurinn játaði brotin skýlaust. Dómurinn taldi honum það til málsbóta en til þyngingar að brotin hefðu verið alvarleg, samfelld og stigvaxandi og að hann hefði ekki látið af háttseminni þrátt fyrir afskipti lögreglu og nálgunarbann.
