Nokkrir ökumenn voru stöðvaðir vegna umferðarlagabrota og gruns um akstur undir áhrifum fíkniefna af lögreglunni á höfuðborgarsvæðinu í gærkvöldi og í nótt. Þá var einn einstaklingur fluttur á bráðamóttöku eftir umferðarslys.

Lögreglu barst tilkynning um árekstur rafhlaupahjóls og bifreiðar. Ökumaður rafhlaupahjólsins var fluttur á bráðamóttöku en ekki liggja fyrir upplýsingar um líðan hans.

Nokkrir ökumenn voru stöðvaðir vegna gruns um akstur undir áhrifum ávana- og fíkniefna. Tveir þeirra reyndust jafnframt hafa verið sviptir ökuréttindum. Annar ökumaður, sem einnig var grunaður um fíkniefnaakstur, var með piparúða á sér og var hann kærður fyrir brot á vopnalögum.

Lögregla hafði einnig afskipti af hraðakstri. Einn ökumaður mældist á 85 kílómetra hraða þar sem hámarkshraði er 60 km/klst. og annar á 117 km/klst. þar sem leyfilegur hámarkshraði er 90 km/klst. Þá var ökumaður stöðvaður eftir að hafa ekið gegn rauðu ljósi.

Tilkynnt var um innbrot og þjófnað og er það mál til rannsóknar. Í öðru tilviki var lögreglu tilkynnt um meint innbrot þar sem maður væri enn inni í húsnæði. Þegar lögregla kom á vettvang kom hins vegar í ljós að maðurinn var starfsmaður öryggisfyrirtækis en ekki innbrotsþjófur.