Niðurstöður rannsóknarverkefnisins Tilraunaborgir (Pilot Cities Project), sem nýlega voru kynntar í umhverfis- og skipulagsráði Reykjavíkur, benda til þess að flokkun heimilisúrgangs sé orðin rótgróin venja meðal borgarbúa. Jafnframt kemur fram að um þriðjungur þeirra sem aka til vinnu væri tilbúinn að velja annan ferðamáta.
Yfir 90 prósent svarenda segjast reglulega flokka pappír, plast og lífrænan úrgang og rúmlega helmingur flokkar einnig sérstaklega meðal annars lyf, húsgögn og byggingarúrgang. Niðurstöðurnar benda til þess að flokkunarvenjur ráðist einkum af aðgengi að innviðum og þjónustu en síður af lýðfræðilegum þáttum.
Einkabíllinn er enn langalgengasti ferðamátinn á höfuðborgarsvæðinu. Um þriðjungur þeirra sem aka til vinnu segist þó vilja skipta yfir í almenningssamgöngur, hjólreiðar eða rafknúin létt farartæki. Þá búa 98 prósent svarenda nógu nálægt vinnustað til að geta nýtt virka ferðamáta.
Helstu hindranir eru sagðar kostnaður, áreiðanleiki og skortur á samkeppnishæfum valkostum við einkabílinn.
Verkefnið Tilraunaborgir er styrkt af Climate KIC undir merkjum NetZeroCities og tengist þátttöku Reykjavíkur í samstarfi 112 evrópskra borga sem stefna að kolefnishlutleysi og snjallvæðingu árið 2030.
