Félag í eigu Guðmundar Kristjánssonar, framkvæmdastjóra Brims, hefur fest kaup á öllu hlutafé útgerðar- og fiskvinnslufyrirtækisins Þórsness í Stykkishólmi. Kaupin voru kynnt starfsfólki í lok júní, en engar breytingar eru fyrirhugaðar á rekstri eða starfsmannahaldi fyrirtækisins.
Eggert Halldórsson mun áfram gegna starfi framkvæmdastjóra, en hjá félaginu starfa á bilinu 50 til 60 manns yfir árið.Með kaupunum eignast nýr eigandi bæði útgerð og fiskvinnslu Þórsness, auk skipa, búnaðar og veiðiheimilda.
Seljandinn er Gunnlaugur Karl Hreinsson hjá GPG fiskverkun, sem hafði verið stærsti eigandi fyrirtækisins síðan hann keypti það árið 2004.
Samhliða eigendaskiptunum liggja fyrir niðurstöður úr rekstrinum en samkvæmt VB var síðasta ár, hápunktur í sögu félagsins. Helstu kennitölur úr uppgjöri Þórsness sýna vaxandi umsvif:
- Metár í rekstri: EBITDA nam 1.114 milljónum króna og er það metárangur í sögu félagsins, en hún var 722 milljónir árið 2024.
- Auknar tekjur: Heildartekjur námu 6.084 milljónum króna og jukust um 25,2% á milli ára.
- Traustur hagnaður: Hagnaður ársins nam 678 milljónum króna, samanborið við 662 milljónir árið áður, þrátt fyrir 97 milljóna króna gengistap á meðan árið 2024 skilaði 200 milljóna króna gengishagnaði.
- Hár arður: Stjórn félagsins leggur til að allt að 1,5 milljarðar króna verði greiddir í arð til hluthafa á árinu.
