Donald Trump tók brosandi á móti Vladimir Pútín Rússlandsforseta á rauðum dregli á herstöð í Alaska í kvöld. Þar með er rúmlega þriggja ára útskúfun og einangrun Pútíns frá Vesturlöndum lokið.

Einstaklega vel fór á með forsetunum tveimur og þótti sérstakt að Pútín fékk far með forsetabifreið Trumps. Þar sáust þeir skellihlæja saman. Ljóst er að Trump sýnir Pútín mun meiri virðingu og vingjarnleika heldur en leiðtogum þeirra ríkja sem eiga að teljast bandamenn Bandaríkjanna.

Leiðtogar annarra vestrænna ríkja, rétt eins og Volodymir Zelenski Úkraínuforseti, óttast að Trump muni sýna Pútín undanlátssemi og jafnvel undirgefni. Auk þess er óttast að Trump muni í reynd vilja veita innrásum og landvinningum lögmæti, enda hefur hann sjálfur hótað slíku undir rós, meðal annars gagnvart Panama og Grænlandi.