Góðan dag.
Eins og Matvælastofnun er kunnugt um eru „Hestarnir úr Borgarnesi” þ.e. þeir sem eftir eru lifandi, staðsettir á Esjumelum.
Hestarnir eru á litlum skika sem smá saman er að breytast í moldarflag.
Það verður að segjast að óþægilegt er að horfa á þessa veslinga enn einu sinni í afleitum aðstæðum. Frá árinu 2022 hef ég fylgst með þessum hrossahóp og hef ekki skilið hvernig dýraeftirlit hefur litið undan, árum saman.
Í lögum um velferð dýra segir í 10.grein:
- gr. Geta, hæfni og ábyrgð.
Hver sá sem hefur dýr í umsjá sinni skal búa yfir eða afla sér grunnþekkingar á þörfum og umönnun viðkomandi dýrategundar og skal enn fremur búa yfir nægjanlegri getu til að annast dýrið í samræmi við lög þessi.
Fyrir löngu eru „eigendur” þessarra hrossa búnir að sanna og sýna getuleysi sitt að hafa slíkan hóp til umráða.
Óþarfi ætti að þurfa að rifja upp málið úr Borgarnesi frá árinu 2022. Ríkisendurskoðun ákvað að hefja stjórnsýsluúttekt á Matvælastofnun eftir umfjöllun blaða um málið.
Sem sé: sömu hestar og sömu umráðamenn, en engin breyting á högum þeirra!
Allnokkrir dýravinir hafa fylgst með núverandi aðstæðum hrossahópsins.
Ég hef fengið samtöl, skilaboð, videó og í umboði þeirra óska ég eftir svörum frá Matvælastofnun:
Hversu lengi er hægt að fara ekki eftir lögum er varðar velferð dýra í „einstökum tilfellum”?
Hversu lengi er hægt að bjóða þessum hestum að hafa ekkert fóður?
Hversu horaðir þurfa þeir að verða svo eitthvað sé gert?
Hver er skilgreining Matvælastofnunar á grein nr 10 úr lögum úr velferð dýra: „að búa yfir nægilegri getu”?
Í ljósi fyrri sögu er stefnan að svelta þá það mikið að hægt sé að smala öllum hópnum, 31 stk, á sláturbíl í eitt skipti fyrir öll?
Er það markmiðið?
Þegar aðili hefur sannarlega brotið af sér er varðar umhirðu dýra, er ekkert eftirlit með þeim aðilum eftir aðkomu Matvælastofnunar?
Vísa ég í aðgerðir Matvælastofnunar í september árið 2022 á þessum hrossahóp.
Engan, engan veginn verður unað við framhald þessarar hörmungarsögu „Hrossanna í Borgarnesi”.
Svör óskast.
Undirrituð
Steinunn Árnadóttir
dýravinur
