Dregið verður úr slætti á völdum svæðum í borginni í sumar og segir borgin að það sé gert í þeim tilgangi að leyfa grasflötunum að blómstra.

Áhersla verður lögð á að halda áfram að slá svæði sem liggja upp að lóðum íbúa og meðfram stígum og götum. Einnig verður skrúðgörðum og mikið notuðum svæðum inni í hverfunum sinnt vel.

Svæðin sem valin verða í þetta verkefni kallar borgin „viljandi villt“ og eru til að mynda jaðarsvæði meðfram stærri umferðaræðum. Það eru oft svæði með fábreytt lífríki en þau verða með þessum breytingum möguleg búsvæði fyrir fugla og aðrar lífverur. 

Borgin segir að þessar aðferðir eru vel þekktar, til dæmis í Svíþjóð og líka í Danmörku þar sem viðamikið verkefni undir nafninu „Vild með vilje“ er rekið um land allt.