Trausti Breiðfjörð Magnússon var borgarfulltrúi Sósíalistaflokksins í borgarstjórn Reykjavíkur frá árinu 2022 til ársins 2024, en hætti störfum vegna veikinda.

Hann fer mikinn á Facebook-síðu sinni og og lætur Gunnar Smára heyra það vegna þess sem hann kallar einfaldlega lygar fyrrum formannsins:

„Til allrar lukku þá ákvað hann að ljúga um hluti sem auðvelt og fljótlegt er fyrir mig að leiðrétta. Í viðtali við Bítið á Bylgjunni á föstudag sagði Gunnar Smári að ég hefði „farið í kulnun því það væri svo rosalegt álag að vera í sambandi við hann.““

Þetta segir Trausti ekki vera rétt:

„Fyrst og fremst þurfti ég að stíga frá vettvangi borgarstjórnar af heilsufarslegum ástæðum. Líkamlegri heilsu minni var að hraka en til marks um það þá þurfti ég á síðasta ári að gangast undir mjaðmaskipti vegna þrálátra verkja af sjúkdómi í mjöðm.“

Hann segir að „því miður kemur það ekki óvart að heyra fyrrverandi prímus mótor Sósíalistaflokksins tala á svo niðrandi hátt um andlega heilsu. Það reynir þó talsvert á hana að starfa með Gunnari Smára. Það var í það minnsta mín upplifun og bætti gráu ofan á svart.“

Trausti ætlar ekki að „hafa mörg orð um það því ég hef lýst því áður opinberlega. Í stuttu máli voru öll samskipti lituð hroka, yfirgangi og frekju af hans hálfu. Það átti sér margar birtingarmyndir en þar á meðal voru ítrekaðar, raunar sífelldar, kröfur og skipanir í skilaboðum. Hingað til hef ég litið svo á að trúnaður ríkti um þau samskipti.“

Trausti segir að Gunnar Smári „þykist ekki kannast við þetta og sakar mig um lygar. Í fyrrnefndu viðtali á Bítinu á föstudaginn hélt hann því fram að okkar samskipti hefðu ekki verið mikil, „þrjú SMS“, eins og hann orðaði það. En til að bíta höfuðið af skömminni, þá brýtur hann trúnað í beinni og les upp úr þessum smáskilaboðum.“

hins vegar kemur það fram í máli Trausta að „Gunnar Smári notar messenger en ekki SMS til að senda sínar eiturpillur. Í ljósi þess að hann brýtur trúnað þá er þetta auðsannað. Hér fyrir neðan má sjá nokkurn fjölda skjáskota sem gefa ákveðna mynd af „samstarfi“ við Gunnar Smára. En fyrst og fremst sýna þau þó að Gunnar Smári hikar ekki við að ljúga í beinni útsendingu.“

Hann nefnir einnig að honum finnist það vera „ógjörningur fyrir venjulegan mann að fylgjast með öllu því sem vellur upp úr Gunnari Smára á ljósvakamiðlum nær daglega. Hvað þá að leiðrétta allt bullið. Því vona ég fólk taki orðum hans bæði um mig, en einnig almennt, með þeim fyrirvara að það er ekki hans sterka hlið að segja rétt og satt frá. Ég er nýbakaður faðir og hef betri og mikilvægari hluti að gera en að leiðrétta lygar ósannindamanns.“