Sigmundur Davíð Gunnlaugsson, formaður Miðflokksins, lét það ekki stöðva sig í nótt að enginn þingmaður sæti í þingsalnum til að heyra ræðuna hans. Hann stóð í ræðupontunni þegar að klukkan sló miðnætti en þingfundi var ekki slitið fyrr en rúmum klukkutíma síðar.
Meðal þingmanna sem héldu ræður á seinustu tímum þingfundarins voru Bryndís Haraldsdóttir, þingmaður Sjálfstæðisflokksins í Suðvesturkjördæmi. Hún er aftur á mælendaskrá í dag og mun halda sína 52. ræðu um veiðigjaldið. Bryndís hefur vakið athygli vegna orða hennar árið 2019 þar sem hún gagnrýndi málþóf.
Aðrir þingmenn sem héldu ræður í nótt voru Guðlaugur Þór Þórðarson, fyrrum ráðherra og þingmaður Sjálfstæðisflokksins í Reykjavíkurkjördæmi norður, Sigurður Ingi Jóhannsson, formaður Framsóknarflokksins og þingmaður í Suðurkjördæmi, Nanna Margrét Gunnlaugsdóttir, þingmaður Miðflokksins í Suðvesturkjördæmi, sem lauk seinustu ræðu þingfundarins klukkan 1:09, en hún er systir Sigmundar Davíðs.
Gagnrýndi málþóf árið 2019
Bryndís Haraldsdóttir, þingmaður Sjálfstæðisflokksins, er sá þingmaður sem er á mælendaskrá í umræðu um veiðigjald á Alþingi í dag, sem hefur haldið næst flestar ræður um málið, eða 52.
Bryndís hefur vakið athygli vegna þess að hún gagnrýndi harðlega málþóf fyrrverandi minnihluta á Alþingi í grein sem hún sendi frá sér árið 2019.
„Því höfum við fengist að kynnast síðustu daga á Alþingi, þar sem fámennur hópur þingmanna hefur tekið afgreiðslu þingmála í gíslingu með málþófi,“ skrifaði hún þá.
„Það er nefnilega ekkert í þingsköpum sem bannar þingmanni að flytja sömu ræðuna tvisvar, eða í tugi skipta, sé út í það farið. Málfrelsi þingmanna er mikilvægt og er það sérstaklega varið í flestum þjóðþingum heims. En málþóf á ekkert skylt við málfrelsi eða lýðræði, og þekkist nánast hvergi utan Íslands.“
Þingið mánuð fram yfir
Umræður um breytingu á veiðigjöldum standa enn yfir og hafa seinkað þinglokum um tæpan mánuð, en samkvæmt starfsáætlun átti þingi að ljúka 13. júní. Þingmenn stjórnarandstöðunnar eru mótfallnir breytingunum sem frumvarpið boðar. Þau reyna að koma í veg fyrir að það verði samþykkt með því að lengja umræðurnar og fresta þinglokum. Vísa þingmennirnir til fjölda athugasemda frá sveitarfélögum og útgerðum, sem vara við áhrifum svokallaðrar „leiðréttingar“ veiðigjalda. Þá hafa þeir gagnrýnt að breyting hafi orðið á útreikningum eftir því sem málið hefur þróast á Alþingi.
Ræðukóngarnir í veiðigjaldsumræðunni*
Þórarinn Ingi Pétursson, Framsóknarflokki: 130 ræður, 6,5 stundir
Ingibjörg Davíðsdóttir, Miðflokkurinn: 102 ræður, 5,7 stundir
Jón Pétur Zimsen, Sjálfstæðisflokkurinn: 81 ræða, 5,5 stundir
Njáll Trausti Friðbertsson, Sjálfstæðisflokkurinn: 93 ræður, 5,1 stundir
Þorgrímur Sigmundsson, Miðflokkurinn: 101 ræða, 5 stundir
* Heimild: Malthof.is
Forseta Alþingis er heimilt að leggja undir þingið að hætta umræðu um mál ef ræðutíminn er kominn úr hófi. Þórunn Sveinbjarnadóttir, forseti Alþingis, hefur þó ekki tekið til þeirra ráða enn. Í heildina hefur verið rætt um veiðigjöldin í 142 klukkustundir en Íslandsmetið er 147 klukkustundir fyrir umræður um þriðja orkupakkann árið 2019.
Lengst hefur talað Þórarinn Ingi Pétursson, þingmaður Framsóknarflokksins, í samtals 6,5 klukkustundir í 130 ræðum um veiðigjaldið, en greint var frá því á Mannlífi í gær að hann hefði haldið röð ræða um sögu úr sjávarútvegi frá þarsíðustu aldarmótum.
Komment