Í dagbók lögreglu frá því í nótt er greint frá því að lögreglumenn við almennt eftirlit urðu varir við grunsamlegar mannaferðir á bifreiðastæði. Við afskipti lögreglu tók annar mannanna á rás en náðist eftir snarpa eftirför á fæti. Sá reyndist vera með nokkuð af ætluðum fíkniefnum í sölupakkningum og töluvert af fjármunum. Maðurinn var handtekinn og vistaður í fangaklefa í þágu rannsóknar málsins.

Annar var handtekinn vegna gruns um sölu og dreifingu fíkniefna. Aftur var töluvert um ætluð fíkniefni í sölupakkningum auk fjármuna. Hann var vistaður í þágu rannsóknar málsins.

Tilkynnt var um bifreið sem ekið var ógætilega og næstum ekið á sjálfboðaliða sem var við gæslustörf í Miðnæturhlaupi Suzuki. Þrátt fyrir leit lögreglu þá fannst bifreiðin ekki.

Við almennt umferðareftirlit urðu lögreglumenn varir við að leigubifreið var ekið nokkuð greitt fyrir aftan þá og án þess að ökumaður væri að tryggja bil milli ökutækja. Þá tendraði ökumaður leigubifreiðarinnar háan ljósgeisla og vildi komast fram úr lögreglubifreiðinni. Ákváðu lögreglumenn að kanna nánar ástand þessa ökumanns enda hegðun hans engan veginn í takt við það sem ætla má frá atvinnubílstjóra. Ökumaðurinn má eiga von á sekt fyrir of hraðan akstur og fyrir að tryggja ekki nægilegt bil milli ökutækja.