„Pólitíkin í þessu máli er viðurstyggileg,“ sagði Jón Pétur Zimsen, þingmaður Sjálfstæðisflokksins á Alþingi fyrir skömmu. Hann sakar ríkisstjórn Kristrúnar Frostadóttur um „að reyna að blekkja almenning með fagurgala og popúlisma“ með frumvarpi um „leiðréttingu“ veiðigjalda, sem felur í sér hækkun þeirra.

Þingmenn Framsóknarflokksins, Miðflokksins og Sjálfstæðisflokksins hafa hver á fætur öðrum fordæmt frumvarpið og vitnað til neikvæðra umsagna sveitarfélaga og útgerða.

Rósa Guðbjartsdóttir, þingkona Sjálfstæðisflokksins, sagði frumvarpið bera merki „hreins og tærs sósíalisma og forræðishyggju“. Hún spurði hvort frumvarpið væri „andúð viðreisnar á þessari atvinnugrein sérstaklega eða er verið að reyna að egna saman landsbyggð og höfuðborgarsvæðinu“.

Þá sagði Jón Pétur að með frumvarpinu yrði svo lítill arður af útgerð að það yrði í hag útgerðarmanna að „selja bara allt heila klabbið og fjárfesta í hlutabréfum og skuldabréfum“.

Jón Pétur tók dæmi af rekstri Skinneyjar-Þinganess á Höfn í Hornafirði. „Arðsemi eiginfjár í því fyrirtæki er 3,7 prósent og eftir að þessi skattur kemur á verður það 0,7 prósent“. Dæmið tók Jón Pétur af rekstri ársins 2023, þegar Skinney Þinganes hagnaðist um tæplega 640 milljónir króna, en samanlagður hagnaður tveggja ára á undan var 6 milljarðar króna.