Sundfélagið Óðinn á Akureyri hefur ráðið Ragnheiði Runólfsdóttur sem yfirþjálfara á nýjan leik. Ragnheiður er ein allra besta sundkona sem Ísland hefur alið af sér. „Ragga býr yfir mikilli reynslu af þjálfun en hún hefur starfað við sundþjálfun frá árinu 1992 og lengst af sem yfirþjálfari,“ segir í tilkynningu á heimasíðu sundfélagsins. Samkvæmt Akureyri.net kemur Ragnheiður til starfa í sumar.

„Ragga er félaginu að góðu kunn þar sem hún sinnti þjálfun hjá Óðni á árunum 1996–1998 og svo aftur á árunum 2011–2019. Að undanförnu hefur hún starfað sem yfirþjálfari í Svíþjóð hjá Simklubben S02 í Gautaborg og hjá KBSS í Kungsbacka,“ segir á vef Óðins. „Við í Sundfélaginu Óðni bjóðum Röggu hjartanlega velkomna til starfa og hlökkum til að vinna með henni að því að efla starfið enn frekar.“

Eins og áður segir er Ragnheiður ein allra besta sundkona Íslandssögunnar en hún var kjörin íþróttamaður ársins 1991 af Samtökum íþróttafréttamanna og varð þannig önnur konan til að hreppa verðlaunin. Á sínum tíma keppti Ragnheiður á tvennum Ólympíuleikum, í Seoul í Suður-Kóreu árið 1988 og í Barcelona á Spáni 1992.