Svandís Svavarsdóttir, formaður Vinstri Grænna, er á fullu í undirbúningi fyrir sveitarstjórnarkosningarnar á næsta ári.

Svandís tjáir sig um ástandið og framtíðina og segist svo frá:

„Á föstudaginn var áttum við mikilvægan stjórnarfund þar sem við rýndum stöðuna í sveitarfélögunum og svæðisfélögunum okkar. Það er skýr þróun að fylgi VG er að mjakast hægt en örugglega upp á við – enda erindi okkar sterkt og skýrt, og það skilar sér!“

Hún segir að nú sé rætt um mögulegt samstarf við önnur stjórnmálasamtök í þeim tilgangi að tryggja sterk og samstillt framboð til sveitarstjórna í næstu kosningum:

„Þetta samstarf og samstaða eru lykillinn að árangri og áhrifum á næsta kjörtímabili. Starf VG er á fullu“ segir brött Svandís enda engan bilbug á henni að finna þrátt fyrir erfiða tíð fyrir flokkinn undanfarin misseri.