Þóra Kristín Ásgeirsdóttir, upplýsingafulltrúi hjá Íslenskri erfðagreiningu og fyrrverandi fjölmiðlakona, lætur stjórnarandstöðuna fá það óþvegið í nýrri Facebook-færslu.

Í færslunni segir Þóra Kristín að í herbúðum Sjálfstæðisflokksins hafi ríkt stöðugt uppnám frá því að flokkurinn neyddist til að yfirgefa stjórnarráðið.

„Það er stöðugt uppnám í herbúðum Sjálfstæðisflokksins eftir að flokkurinn þurfti að yfirgefa stjórnarráðið. Þingmenn valdaflokksins eru ekki í karakter í núverandi hlutverki, þeir garga og gagnrýna allt laust og fast, alltaf jafn reiðir og sárhneykslaðir sama hvert tilefnið er.“

Nefnir hún sérstaklega Víði Reynisson og lætin sem urðu þegar í ljós kom að hann hafði hringt í Útlendingastofnun og ríkislögreglustjóra vegna máls hins 17 ára Oscars And­ers Boca­negra Flor­ez, sem til stóð, þar til því var frestað, að vísa brott af landinu en hann á fósturfjölskyldu hér á landi.

„Nú er það framganga Víðis sem kvelur þau, hann vildi ekki horfa þegjandi upp á að 17 ára unglingur, sem býr hér í skjóli fósturforeldra sem taka ábyrgð á honum, yrði dreginn fram úr rúmi sínu og fluttur nauðungarflutningi á götuna í Kólumbíu, meðan einungis eru nokkrir dagar þar til Alþingi tekur afstöðu til þess hvort hann fær ríkisborgararétt á Íslandi.
Eina sem Víðir gerði var að vekja athygli á því að það gæti borgað sig að bíða eftir niðurstöðu áður en lögreglan hæfist handa við brottflutning.“

Segir Þóra þingmenn Sjálfstæðisflokksins „liggja á hundaflautunni“ vegna málsins og krefjist þess að framtíðarmöguleikar Oscars verði eyðilagðar.

„Þingmenn flokksins liggja á hundaflautunni og krefjast þess að fá höfuð Víðis á fati og að framtíð þessa unglings verði lögð í rúst, þeir eru skjálfandi af heift og bræði.
En uppnámið er í grunninn vegna þess, að þau telja að valdarán hafi verið framið í landinu. Það sé hérna vinsæl ríkisstjórn, án þess að þau og sérhagsmunir skjólstæðinga þeirra eigi nokkra aðkomu að henni.“

Að endingu segir Þóra Kristín að án valds og forréttinda sé stjórnarandstaðan alsber, „gráthlægileg“ og „stundum óbærilega leiðinleg“.

„Þau eru ekki í karakter í minnihluta, kunna ekki að reka málefnalega og einarða stjórnarandstöðu og vera ósammála án þess að saka viðmælandann í sífellu um lögbrot og heimta refsingar. Þau eru búin að klæða sig uppá í völdin og forréttindin. Án þeirra eru þau berrössuð. Þau eru varla hættuleg, frekar gráthlægileg og stundum alveg óbærilega leiðinleg.“