Þrír unglingar hafa verið dæmdir til fangelsisvistar fyrir hrottalegt ofbeldi sem leiddi til dauða heimilislauss manns, sem var keyrður niður, eltur og barinn með ginflösku.

Eymaiyah Lee Bradshaw-McKoy, 18 ára, Mia Campos-Jorge, 19 ára, og Jaidee Bingham, 18 ára, réðust á Anthony Marks, 51 árs, með þeim afleiðingum að hann hlaut heilablæðingu sem leiddi til dauða hans fimm vikum síðar. Kviðdómur við Old Bailey-dómstólinn í London var 47 klukkustundir og 47 mínútur að komast að niðurstöðu og sakfelldi Bingham fyrir morð 30. október.

Bradshaw-McKoy og Campos-Jorge voru sýknaðar af morði en fundnar sekar um manndráp af gáleysi. Öll þrjú voru engu að síður fundin sek um dauða Marks, þrátt fyrir „misheppnaðar tilraunir til að bjarga lífi hans“, eins og kom fram fyrir dómi.

Í dag dæmdi dómarinn Mark Dennis Bingham í lífstíðarfangelsi með lágmarksafplánun upp á 16 ár. Bradshaw-McKoy hlaut dóm upp á þrjú ár og ellefu mánuði, en Campos-Jorge þrjú ár og sex mánuði.

Rannsóknarlögreglumaðurinn Jim Barry hjá sérdeild Metropolitan-lögreglunnar í Norður-Lundúnum, sem stýrði rannsókninni, sagði:

„Þetta er einstaklega miskunnarlaust morð sem veitir innsýn í grimmilega og samviskulausa ofbeldismenningu county lines-fíkniefnagengja. Aldur þeirra Bingham, Bradshaw-McKoy og Campos-Jorge er sérstaklega sláandi. En sú staðreynd að þau voru unglingar réttlætir ekki ofbeldisverk þeirra sem hluta af fíkniefnasölu sem hefur valdið ótta og ógn á götum Lundúna.“

Bætti hann við:

„Þau töldu sig hafa sloppið undan réttvísinni, og stilltu sér jafnvel upp saman í sjálfumyndum og hlógu að því sem þau höfðu gert. Það er ákveðin réttlætiskennd fólgin í því að lögreglan gat notað þær myndir til að staðsetja þau á vettvangi. Þessi dómur sýnir að lögreglan tekur baráttuna gegn glæpagengjum alvarlega og er staðráðin í að ná réttlæti fyrir fórnarlömbin.“

Samkvæmt Metropolitan-lögreglunni hlaut Marks „högg af vélarhlíf bíls, hann var eltur, traðkað var á honum og hann barinn með ginflösku í grimmilegri hefndaraðgerð county lines-gengis“.

Starfsfólk á King’s Cross-lestarstöðinni í Lundúnum kallaði á neyðarþjónustu um klukkan 5:25 að morgni 10. ágúst 2024 eftir að hafa fundið Marks ráfandi nálægt aðalsvæðinu, alvarlega slasaðan í andliti og með blóð rennandi úr höfði sér.

Hann var í „lífshættulegu ástandi“ þegar sjúkraflutningamenn komu á staðinn og fluttu hann á St Mary’s-sjúkrahúsið í Paddington. Tölvusneiðmynd sýndi heilablæðingu af völdum ofbeldisins, ofan á eldri höfuðáverka.

Á sama tíma kom í ljós að Marks hafði brotið gegn skilorði og var verið kallaður aftur í fangelsi. Í lögregluyfirheyrslu lýsti hann því að hafa verið beittur ofbeldi fyrir utan lokaða McGlynn’s-krána, eftir ágreining við fíkniefnasala vegna stolins kókaíns.

Marks sagði lögreglu:

„Ég hitti fíkniefnasalann í hverfinu mínu, hann kallast Ghost. Hann kvartaði yfir því að einn neytandi hefði tekið eiturlyf af einni af stelpunum sem vinna fyrir hann og hlaupið í burtu. Ég sagði honum að þetta kæmi mér ekki við, en hann hélt því fram að ég vissi hverjir þetta voru. Ég sagði að ég vissi hverjir þeir væru, en hefði ekki tekið neitt.“

Hann sagði Ghost og stúlkurnar tvær hafa elt sig að kránni þar sem sparkað var í hann hann og hann sleginn. Ghost reyndist vera gælunafn Bingham, en „eltararnir“ tveir voru Bradshaw-McKoy og Campos-Jorge.

Saksóknari sagði að hvöt þeirra hefði verið augljós: ein stúlknanna hefði verið rænd og beitt ofbeldi við fíkniefnaafhendingu fyrir Bingham, og þau hefðu talið Marks bera ábyrgð, beint eða óbeint. Slíkt ofbeldi „mætti ekki líðast“.

Marks var útskrifaður af sjúkrahúsi 13. ágúst og fluttur í fangelsi. Þar kvartaði hann undan höfuðverkjum og talörðugleikum, en var ekki sendur í frekari heilaskönnu

Fyrsta ágúst fékk hann flog í fangaklefa sínum og var fluttur á King’s College-sjúkrahúsið þar sem hann gekkst undir bráðaaðgerð til að fjarlægja blóðtappa.

Hann lést 14. september eftir að tekin var klínísk ákvörðun um að hætta meðferð, þar sem enginn nákominn ættingi var til staðar. Dánarorsök var heilablæðing af völdum ofbeldisins mánuði fyrr.