Hljóðbylgjur gætu í framtíðinni gegnt mikilvægu hlutverki í því að stöðva skógarelda á byrjunarstigi.

Í umfjöllun Scientific American kemur fram að bandaríska tæknifyrirtækið Sonic Fire Tech hafi þróað nýstárlegt slökkvikerfi sem byggir á notkun svokallaðs infrasound, það er hljóðbylgja sem eru neðan heyrnarsviðs mannsins. Markmiðið er að kæfa smáa elda áður en þeir ná að breiðast út. Bændablaðið fjallaði um málið.

Tæknin byggir á því að raska einu af grundvallarskilyrðum elds, súrefni. Með því að láta súrefnið titra hraðar en bruninn nær að nýta það stöðvast efnahvarfið sem viðheldur eldinum. Geoff Bruder, flugverkfræðingur og stofnandi Sonic Fire Tech, segir að tilraunir hafi sýnt að kerfið geti virkað í allt að 7,5 metra fjarlægð.

Þótt hugmyndin virðist nýstárleg er hún ekki án fordæma. Bandaríska varnarmálaráðuneytið rannsakaði sambærilegar aðferðir á árunum 2008 til 2011 og árið 2015 var kynnt til sögunnar hljóðknúið slökkvitæki sem minnti helst á subwoofer-magnara. Samkvæmt Albert Simeoni, prófessor við Worcester Polytechnic Institute, eru áhrif hljóðbylgja á eld vel þekkt innan brunavísinda, en helsta hindrunin sé að þróa kerfið þannig að það virki í stærra samhengi án þess að valda óþægilegum eða skaðlegum hljóðáhrifum.

Sonic Fire Tech hefur þegar þróað lausnir sem ætlaðar eru til að verja hús gegn eldsvoðum. Þar er infrasound, með tíðni undir 20 hertzum, nýtt vegna þess að slíkar bylgjur berast lengra en hefðbundið hljóð og eru óheyranlegar fyrir mannseyra. Kerfið samanstendur af stimplum sem knúnir eru af rafmótorum og senda bylgjur um málmrör sem liggja eftir þökum og undir þakskeggjum. Þegar skynjarar nema loga fer kerfið sjálfkrafa í gang og myndar eins konar varnarsvæði sem dregur úr líkum á að eldur kvikni eða breiðist út.

Sérfræðingar benda þó á að tæknin nýtist enn sem komið er aðeins gegn litlum eldum. Arnaud Trouvé, prófessor við Háskólann í Maryland, segir engu að síður mikinn áhuga vera á frekari þróun. Fyrirtækið vinnur nú í samstarfi við tvö orkufyrirtæki í Kaliforníu og stefnir á að setja upp 50 tilraunakerfi snemma árs 2026. Jafnframt hafa nokkrir húseigendur þegar gengið til samninga um uppsetningu kerfisins.