Baldur Þórhallsson stjórnmálaprófessor segir ágirnd Bandaríkjanna á Grænlandi vera komið á nýtt og enn alvarlegra stig en áður.
Baldur skrifaði færslu á Facebook í morgun í kjölfar formlegrar yfirlýsingar Hvíta hússins um Grænland. Færslan hefst á eftirfarandi máta:
„Formleg yfirlýsing Hvíta hússins um Grænland færir málið á nýtt og enn alvarlegra stig.
Þetta er alvarlegri og formlegri hótun heldur en komið hefur fram áður.
Yfirlýsingin er svohljóðandi á frummálinu:
,,President Trump has made it well known that acquiring Greenland is a national security priority of the United States, and it’s vital to deter our adversaries in the Arctic region. The President and his team are discussing a range of options to pursue this important foreign policy goal, and of course, utilizing the US Military is always an option at the Commander in Chief’s disposal“.”
Stjórnmálaprófessorinn nefnir fimm atriði í samhengi við yfirlýsinguna:
„Fimm atriði í þessu samhengi:
Það eitt að forsetaskrifstofan lýsi því formlega yfir að hún sé að kanna leiðir til að koma Grænlandi undir yfirráð Bandaríkjanna veikir NATO og fælingarmátt þess. En ríki NATO - þar með talið Danmörk - sæta stöðugum fjölþátta árásum frá Rússlandi.
Það að forsetaskrifstofan segi formlega að beiting bandaríska hersins gegn öðru NATO ríki sé möguleiki í þessu samhengi er enn alvarlegra. Framtíð NATO er í húfi.
Óformlegt tal bandaríska utanríkisráðherrans bak við luktar dyr að Bandaríkin muni ekki beita hervaldi til að ná völdum á Grænlandi hefur engan veginn sama vægi og formleg yfirlýsing forsetaskrifstofunnar.
Skásti leikur Grænlendinga og Dana í stöðunni er að tryggja áfram stuðning stóru bandalagsríkja sinna í Evrópu. Þau þurfa að beita diplómatískum leiðum til að reyna að fá bandarísk stjórnvöld ofan af áformum sínum.“
Síðasta atriðið sem Baldur nefnir snýr að rifrildum danskra ráðamanna við Bandaríkjaforseta, sem hann segir þá ekki geta unnið.
„Danskir ráðamenn ættu auk þessa að hætta að munnhöggvast við Trump í fjölmiðlum. Þeir vinna ekki þann slag.“
