Breskur maður lést á gamlárskvöldi meðan hann var í fríi í Gambíu en andlátið hefur skiljanlega valdið fjölskyldu hans miklum harmi.

Michael Clarke, sem var frá Yorkskíri á Englandi, drukknaði í sundlaug á Mansea Beach hótelinu í Kololi, við Atlantshafsströnd vestur-afríska ríkisins. Slysið átti sér stað 31. desember.

Að sögn aðstandenda var enginn starfsmaður eða sundlaugarvörður á staðnum þegar slysið varð. Clarke, sem var 64 ára, fór í laugina og er talið að hann hafi fengið hjartastopp, hugsanlega vegna kalds vatns. Þar sem engin tafarlaus aðstoð barst drukknaði hann í lauginni.

Fjölskylda hans vinnur nú að því að flytja lík hans heim til Bretlands og hefur sett upp söfnun á GoFundMe til að standa straum af kostnaði við heimflutning og útför. Dóttir hans, Victoria Walker, segir að nauðsynlegt sé að safna fé til að koma föður hennar heim.

„Faðir minn hafði glímt við þunglyndi í yfir 20 ár, ástand sem hann bar í hljóði og barðist við af mikilli seiglu,“ segir hún.

Hún bætir við að undanfarna mánuði hafi faðir hennar verið á raunverulegri batagöngu og lagt áherslu á andlega heilsu sína og að endurheimta innri ró. Ferðin hafi verið honum afar mikilvæg, enda fyrsta utanlandsferð hans í 20 ár.

„Það sem gerir þennan missi sérstaklega sársaukafullan er að ferðin átti að marka nýtt upphaf fyrir hann, skref í átt að lífinu, ekki endalok þess. Fjölskyldan er enn að reyna að melta hvernig ferð sem ætlað var til lækningar og hvíldar endaði í svo skyndilegum harmleik,“ segir Victoria.

Hún segir fjölskylduna afar þakkláta fyrir allan stuðning sem geti hjálpað til við að standa straum af kostnaði við útför og heimflutning líkamsleifa.

„Við leitum til fólks eftir aðstoð, hvert framlag, sama hversu lítið, mun fara beint í að koma honum heim og veita honum þá útför sem hann á skilið,“ segir hún.

Söfnunin á GoFundMe hefur þegar safnað yfir 1.200 pundum frá um 40 einstaklingum og markmiðið er að ná 10.000 dollurum fyrir fjölskylduna.