Donald Trump Bandaríkjaforseti bætti í dag í óvenjulegar hótanir sínar um að senda Bandaríkjamenn í erlend fangelsi og sagði að hann myndi gjarnan vilja vísa „heimaöldum“ bandarískum ríkisborgurum sem fremja ofbeldisglæpi í alræmt risafangelsi í El Salvador.

Trump ræddi hugmyndina á mánudag í viðræðum við Nayib Bukele, forseta El Salvador - sem kallar sjálfan sig „svalasta einræðisherra heims“ og hefur þegar tekið við brottfluttum innflytjendum frá Bandaríkjunum í fangelsi landsins.

Hinn 78 ára gamli Trump ítrekaði hugmyndina um að senda einnig bandaríska ríkisborgara til El Salvador og reyna þar með enn frekar á mörk grundvallarréttinda Bandaríkjamanna.

„Ég kalla þá heimaalda glæpamenn,“ sagði Trump samkvæmt brotum úr viðtali við Fox Noticias, spænskumælandi dagskrárlið, sem verður sýndur síðar í dag.

„Þeir sem ólust upp hér og eitthvað fór úrskeiðis og lemja fólk í hausinn með hafnaboltakylfu og ýta fólki fram af neðanjarðarlestarbrautarpöllum,“ bætti hann við.

„Við erum að skoða þetta og viljum gera það. Ég myndi elska að gera þetta.“

Á mánudag sagði Trump á fundi sínum með Bukele í forsetaskrifstofunni að hann hefði beðið Pam Bondi dómsmálaráðherra að kanna möguleikann á að senda Bandaríkjamenn til El Salvador.

Hinn harðhenti Bukele kom með þetta óvenjulega tilboð um að taka við föngum frá Bandaríkjunum skömmu eftir að Trump tók við embætti í annað sinn, í skiptum fyrir 6 milljóna dollara gjald.

Trump hefur þegar sent meira en 250 innflytjendur þangað, flesta samkvæmt aldagömlum lögum frá stríðstímum sem svipta þá réttlátri málsmeðferð - en hann hefur í auknum mæli farið að tala um að senda bandaríska ríkisborgara líka.

Stjórn Trumps er þegar undir þrýstingi vegna máls innflytjanda sem var fyrir mistök vísað úr landi frá Bandaríkjunum til El Salvador samkvæmt samningi við Bukele.

Bukele vísaði á mánudag á bug þeirri „fáránlegu“ hugmynd að skila manninum - Kilmar Abrego Garcia, föður sem bjó í Maryland-ríki Bandaríkjanna - aftur til Bandaríkjanna. Enda gæti hann ekki „smyglað hryðjuverkamanni“ til Bandaríkjanna.

Hæstiréttur Bandaríkjanna hefur skipað stjórn Trumps að greiða fyrir endurkomu hans frá hinu alræmda fangelsi Cecot eftir að Hvíta húsið sagði að honum hefði verið vísað úr landi vegna „stjórnsýslumistaka“.

Embættismenn Trumps halda því fram að hann sé ólöglegur innflytjandi og meðlimur í hinu alræmda MS-13 glæpagengi í El Salvador, þrátt fyrir að hann hafi aldrei verið dæmdur og verið með gilt landvistarleyfi.