Tónlistarmaðurinn Auðunn Lúthersson, betur þekktur sem Auður, hefur gefið út nýtt lag sem hann segir innblásið af nostalgíu um reykvískar sumarnætur. Lagið blandar saman tilfinningaþrungnum hljómagangi og orkuríkum trommum.
„Þetta lag fjallar líka um þessa sterku tilfinningu að verða skotinn í einhverjum. Ég held að tónlist sé sá miðill sem kemst næst því að fanga augnablik og varðveita þau. Sumarnætur á Íslandi geta verið svo kraftmiklar, bjartar og rómantískar,“ segir Auður í fréttatilkynningu.
Í laginu syngur hann meðal annars:
Hún kyssir mig
undir berum næturhimni
tíminn er að blekkja
flugeldar
sprengjur ofan'í brjóstkassanum
málvillur rökleysi
hugsa ég með framheilanum?
Umslag smáskífunnar prýðir ljósmynd sem Hrafnhildur Lúthersdóttir tók á Ólafsfirði.
„Mig langaði í fallega mynd af sólsetri fyrir lagið og Hrafnhildur systir mín átti þessa geggjuðu mynd frá Ólafsfirði,“ segir Auður.
Söngvarinn, sem er ættaður úr Hafnarfirði, heldur tónleika þann 20. september í Bæjarbíói í heimabæ sínum.
Auðunn býr nú í Los Angeles þar sem hann vinnur við hljóðupptökur og lagasmíðar.
„Mér gengur svaka vel. Ég hef búið í LA núna í tvö ár og er kominn með ágætis tengslanet. Ég fæ að semja tónlist á hverjum degi og var að ljúka tökum á mjög metnaðarfullu tónlistarmyndbandi. Leikstjóri myndbandsins heitir David Telles. Ég lék aðalhlutverk í stuttmyndinni hans Freyr sem var frumsýnd á Tribeca Film Festival og kemur á Hulu í haust.“
Auður segist hlakka mikið til að snúa aftur heim á sviðið í Hafnarfirði.
„Það verður gaman að koma heim til Íslands og syngja í Bæjarbíói! Ég kem fram ásamt hljómsveit og er spenntur að fá að koma fram á móðurmálinu og syngja lögin mín.“
Hægt er að ná í nýja lagið hér.
