Global Sumud-bátaflotinn, sem stefnir með hjálpargögn til Gaza, hefur greint frá annarri árás á eitt skipa sinna, aðeins einum degi eftir fyrri árás.

Mauricio Morales, blaðamaður sem ferðast með flotanum, sagði í samtali við Al Jazeera að skipið Alma hefði orðið fyrir árásinni. Eldur kviknaði um borð í skipinu, sem lá við höfnina í Sidi Bou Said í Túnis, en slökkt var í honum fljótlega. Morales birti mynd af því sem virtist vera leifar þess skotfæris sem notað var í árásinni.

Leila Hegazy, egypsk-ítölsk söngkona og áhöfnarmeðlimur á Alma, lýsti árásinni í myndbandi sem hún birti á samfélagsmiðlum:

„Við heyrðum einhvern hrópa „dróni!“ og við hlupum inn og settum á okkur björgunarvesti,“ sagði hún. Hegazy hafði þá rétt lokið næturvaktinni sinni þegar árásin átti sér stað.

„Við vonum að þetta verði ekki að næturrútínu, því þeir eru að leika sér af mikilli grimmd.“

Í yfirlýsingu Global Sumud-flotans (GSF) segir meðal annars að Alma, sem siglir undir breskum fána, hafi í gærkvöldi orðið fyrir drónaárás í túnískri landhelgi. Eldur hafi valdið skemmdum á efra þilfari en tekist hefði að slökkva hann og að allir farþegar og áhafnarmeðlimir séu óhultir. Rannsókn á árásinni sé hafin og frekari upplýsingar verði birtar síðar. Árásin, sem átti sér stað skömmu fyrir miðnætti, hafi fylgt í kjölfar svipaðrar árásar á skipið Family fyrr sama dag. Fram kemur einnig í yfirlýsingunni að flotinn muni ekki láta kúga sig og haldi áfram friðsamlegri ferð sinni til að rjúfa ólöglegt umsátur Ísraels um Gaza.

Mögulega var handsprengju varpað úr drónanum

Francesca Albanese, sérlegur skýrslugjafi Sameinuðu þjóðanna um mannréttindi á hernumdu svæðum Palestínu, sagði að myndbandsupptökur bentu til þess að dróni hefði varpað sprengju á þilfar Alma. Hún sagði sérfræðinga telja að um hafi verið að ræða handsprengju með kveikiefni, vafða inn í plast bleytt í eldsneyti, sem hafi kviknað áður en hún lenti á skipinu.

Saif Abukeshek, palestínskur aðgerðasinni og í stýrinefnd GSF, sagði að flotinn hygðist halda áfram siglingu þrátt fyrir tvær aðskildar árásir á skip flotans.

„Þetta þjóðarmorðsríki hefur sprengt Palestínumenn í 78 ár. Þeir hafa framið þjóðarmorð í 22 mánuði, og samt vakna Palestínumenn á hverjum degi með von um betri morgundag,“ sagði hann í samtali við Al Jazeera.

„Ef við getum sótt innblástur í seiglu þeirra, hvernig ættum við þá að gefast upp eftir aðeins tvö atvik sem við höfum lent í?“

Hann bætti við: „Við erum staðráðin í að halda áfram baráttunni.“

Árásir Ísraels á flotann til Gaza frá 2010

Ísrael hefur annaðhvort ráðist á eða stöðvað alla bátaflota sem stefnt hafa til Gaza síðan 2010. Nokkur af helstu atvikunum eru:

• Í maí á þessu ári varð skipið The Conscience, sem sigldi með Freedom Flotilla Coalition (FFC), fyrir tveimur drónaárásum. Eldur kom upp í vélarrúmi og stórt gat myndaðist á skrokknum. Skipið var þá statt í alþjóðlegri lögsögu nálægt Möltu.
  
• Árið 2010 réðust ísraelskir hermenn á skipið Mavi Marmara í alþjóðlegri lögsögu. Tíu aðgerðarsinnar létust og tugir særðust. Skipið, sem var í eigu tyrknesks hjálparsamtaka, var með mannúðaraðstoð og yfir 600 farþega um borð. Atvikið olli mikilli alþjóðlegri reiði.
  
• Ísraelskir hermenn hafa einnig stöðvað flotilluskip á leið til Gaza, þar á meðal Madleen og Handala fyrr á þessu ári, og skipið Marianne árið 2015.

Hægt er að fylgjast með flotanum, sem telur yfir 40 skip frá fjölmörgum löndum, hér.