Donald Trump, forseti Bandaríkjanna, hét því í dag að árásir á Húta í Jemen myndu halda áfram þar til þeir væru ekki lengur ógn við siglingar, og varaði uppreisnarmennina og íranska bakhjarla þeirra við „raunverulegum sársauka“ sem væri í vændum.

Hótun Trumps á samfélagsmiðlinum Truth Social kemur á sama tíma og stjórnin hans berst við hneykslismál vegna spjalls milli háttsettara bandarískra embættismanna um árásirnar á Jemen sem lak óvart til blaðamanns.

Þetta gerist einnig á sama tíma og orðræða Trumps gagnvart Teheran harðnar, en forsetinn hótar því að „það verði sprengjuárásir“ ef Íran nær ekki samkomulagi um kjarnorkuáætlun sína.

„Valið fyrir Húta er skýrt: Hættið að skjóta á bandarísk skip og við munum hætta að skjóta á ykkur. Annars erum við rétt að byrja og raunverulegi sársaukinn er að koma, bæði fyrir Húta og bakhjarla þeirra í Íran,“ sagði Trump.

Trump bætti við að Hútar hefðu verið „gjöreyðilagðir“ af „miskunnarlausum“ árásum síðan 15. mars og sagði að bandarískir herir „létu höggin dynja á þá á hverjum degi — fastar og fastar.“

„Árásir okkar munu halda áfram þar til þeir eru ekki lengur ógn við siglingafrelsi,“ sagði hann á samfélagsmiðli sínum.

Undanfarna daga hefur Trump ítrekað lagt áherslu á það sem hann kallar árangur bandarískra árása á Húta í hvert skipti sem hann er spurður um svokallað „Signalgate“ hneykslismál sem hefur skekið stjórn hans.

Tímaritið The Atlantic greindi frá því í síðustu viku að ritstjóra þess hefði fyrir mistök verið bætt í spjall á hinum almennt aðgengilega Signal-smáforritinu þar sem háttsettir embættismenn ræddu árásirnar á Jemen.

Embættismennirnir, þar á meðal Mike Waltz, þjóðaröryggisráðgjafi Trumps, og Pete Hegseth, varnarmálaráðherra, afhjúpuðu upplýsingar um tímasetningar loftárása og aðrar leynilegar upplýsingar.

Trump hefur hafnað kröfum um að reka Waltz eða Hegseth og kallað hneykslismálið „nornarveiðar“.

„Þessu máli hefur verið lokað hér í Hvíta húsinu að því er okkur varðar,“ sagði Karoline Leavitt, fjölmiðlafulltrúi Hvíta hússins, við blaðamenn í dag.

Bæði Waltz og Hegseth endurbirtu skilaboð Trumps á Truth Social um Húta.