Þorgerður Katrín Gunnarsdóttir utanríkisráðherra hefur ákveðið að veita 150 milljóna króna viðbótarkjarnaframlag til Palestínuflóttamannaaðstoðar Sameinuðu þjóðanna (UNRWA) vegna átakanna fyrir botni Miðjarðarhafs.
Það var Martin Eyjólfsson, ráðuneytisstjóri utanríkisráðuneytisins, sem tilkynnti um framlagið á ársfundi ráðgjafaráðs UNRWA (Advisory Commission) sem haldinn var á fjarfundarformi í gær.
Hefur einnig verið ákveðið að veita 30 milljóna króna viðbótarframlag til svæðissjóðs Samhæfingarskrifstofu aðgerða Sameinuðu þjóðanna í mannúðarmálum (OCHA) fyrir Palestínu (OCHA oPt).
Þorgerður Katrín segir að það sé skylda þjóða heimsins að leggja sitt af mörkum til að reyna allt hvað þær geta til að lina þjáningar íbúa á Gaza, er hafa þurft að upplifa algjöran hrylling, hungursneyð og „horfa nú fram á hræðilegan skort.“
Hún bætir því við að „stuðningur við þá grunnþjónustu sem UNRWA veitir Palestínuflóttamönnum á Gaza og Vesturbakkanum og í nágrannaríkjunum; Jórdaníu, Sýrlandi og Líbanon, er lykilþáttur í að viðhalda eins miklum stöðugleika og mögulegt er í þessum hörmulegu aðstæðum“ og segir Þorgerður Katrín ástandið vera þyngra en tárum taki og að “alþjóðasamfélagið verði að bregðast við.”
Ísland hefur ekki áður átt aðild að ráðgjafaráði UNRWA. Landið fékk að þessu sinni sérstakt boð um að sækja fund þess í ljósi þeirra aðstæðna er ríkja í Mið-Austurlöndum, og einnig á grundvelli þess að hafa um langt árabil verið stuðningsríki stofnunarinnar.
UNRWA þiggur umboð sitt frá allsherjarþingi Sameinuðu þjóðanna og hefur þorri aðildarríkjanna mótmælt banni ísraelskra stjórnvalda við starfsemi UNRWA á Gaza, þar á meðal Ísland.
Segir Þorgerður Katrín að „vegna þess neyðarástands sem skapast hefur á Gaza hafa íslensk stjórnvöld hækkað framlög sín til neyðaraðstoðar á grundvelli mannúðarsjónarmiða” en frá árinu 2023 hafa kjarnaframlög til UNRWA numið yfir 250 milljónum króna „en á þessu ári eru framlögin nú þegar orðin 260 milljónir króna, segir Þorgerður Katrín.
Hún bendir einnig á að auk UNRWA hefur Ísland styrkt Matvælaáætlun Sameinuðu þjóðanna (WFP), svæðasjóð OCHA fyrir Palestínu, Rauða hálfmánann á Gaza gegnum Rauða krossinn á Íslandi, og UNESCO.
Komment