Breytingar voru gerðar í dag á þjálfarateymi meistaraflokks kvenna hjá Víkingum.

Í tilkynningu sem knattspyrnudeild Víkings sendi frá sér segir að John Henry Andrews þjálfari meistaraflokks kvenna og Björn Sigurbjörnsson aðstoðarþjálfari liðsins hafi látið af störfum sem þjálfarar meistaraflokks kvenna.

Þar segir að John hafi tekið við þjálfun liðsins í nóvember 2019 og náð frábærum og eftirtektarverðum árangri í sínu starfi.

John fékk það mikilvæga verkefni í hendurnar að byggja upp nýjan meistaraflokk kvenna hjá félaginu og á þessum tíma sigraði liðið Lengjudeildina 2023, varð Mjólkurbikarmeistari árið 2023 og lenti í þriðja sæti Bestu deildar kvenna í fyrra.

Aðstoðarþjálfarinn Björn kom inn í þjálfarateymi Víkings haustið 2024. Hann þjálfaði áður um árabil hjá sænska úrvalsdeildarfélaginu Kristianstads DFF og síðan Selfoss, áður en hann sneri heim í Víking.

Segir í tilkynningunni að það sé ákvörðun stjórnar knattspyrnudeildar Víkings að tímabært sé nú að gera breytingar með hagsmuni liðsins og framtíðaruppbyggingu að leiðarljósi.

Stjórn knattspyrnudeildar Víkings þakkar John og Birni fyrir samstarfið og óskar þeim velfarnaðar og hamingju í næstu verkefnum, en stjórnin hefur hafið undirbúning að ráðningu nýs þjálfara og verður tilkynnt um framhaldið þegar það liggur fyrir.