Grænlendingar fengu ekki viðurkenningu fyrir landslið sín í knattspyrnu til að taka þátt í undankeppnum stórmóta, líkt og þeir vonuðust til, en þetta varð ljóst eftir að umsókn Grænlendinga í CONCACAF var hafnað.

Grænland fær ekki keppnisrétt fyrir landslið sín í knattspyrnu í undankeppnum stórmóta á næstunni. Knattspyrnusamband Norður- og Mið-Ameríku og karabísku eyjanna, CONCACA, synjaði umsókn Grænlands að sambandinu, og það með öllum greiddum atkvæðum.

Grænlendingar hafa áður athugað með að fá aðild að Evrópska knattspyrnusambandinu, UEFA, en það gekk ekki upp vegna legu landsins. Hófst þá grænlenska knattspyrnusambandið handa við að sækja um aðild að CONCACAF.

Grænlendingar eru eðlilega svekktir með þessa niðurstöðu og benda á að nágrannar þeirra, Færeyingar, hafa haft fulla og sjálfstæða aðild að UEFA og FIFA um áratugaskeið og geta tekið þátt í undankeppnum EM og HM þrátt fyrir að vera sambandsríki Danmerkur.

Þrátt fyrir vonbrigðin að þessu sinni þá munu Grænlendingar engu að síður halda úti landsliði í knattspyrnu. Hisn vegar eru verkefnin af mjög svo skornum skammti þar sem grænlenska landsliðið er ekki formlega viðurkennt af FIFA.