Á fjörtíu ára sögu hefur Mannlíf tekið á sig mismunandi birtingarmyndir. Nú er tekin við önnur endurnýjun þegar Sameinaða útgáfufélagið hefur fengið samþykki Samkeppniseftirlitsins til að taka formlega við rekstri miðilsins.
Síðustu vikur hefur endurmótun Mannlífs verið yfirstandandi með fyrirvara um samþykki Samkeppniseftirlitsins. Mannlíf verður áfram áhugadrifinn fréttamiðill með þann tilgang að veita merkingarbæra innsýn í málefni samfélagsins og reynsluheim fólks, án áhrifa hagsmuna- og stjórnmálaafla.
Áhugaverðar og beittar fréttir verða birtar úr ýmsum efnisflokkum, meðal annars peninga, pólitík, heimsmálin, atburði innanlands og stór samfélagsmál. Unnið verður að því að endurvekja efnisþætti sem tengdir hafa verið tímaritinu Mannlífi í gegnum tíðina, svo sem úttektir, nærmyndir og Mannlífsviðtöl. Áfram verður því gefinn gaumur sem gerist bakvið tjöldin í stjórnmálum, viðskiptum og menningu í stíl kassískra slúðurdálka dagblaða og tímarita.
Afmarkaður hluti af efni Mannlífs verður í framhaldinu eingöngu opinn áskrifendum sem tímaritsefni. Þar er um að ræða tímafrekari blaðamennsku sem ekki verður fjármögnuð með auglýsingatekjum af flettingum einum saman. Nægt framboð verður þó af opnum daglegum fréttum. Lesendum, sem þannig líst á, verður síðan gefið tækifæri til að styrkja miðilinn.
Gefið út af Sameinaða útgáfufélaginu
Yfirtakan kemur í kjölfar þess að tveir af 23 eigendum Sameinaða útgáfufélagins samþykktu að afhenda félaginu Mannlíf og tengdar eignir án endurgjalds, úr félaginu Sólartúni ehf, til þess að stuðla að framgangi og þróun fjölmiðilsins, sem stofnaður var árið 1984.
Tilgangur Sameiginlega útgáfufélagsins með yfirtökunni er að styðja fjölbreytta fjölmiðlun á Íslandi í krafti samlegðaráhrifa, með það að augnamiði að sem flestir Íslendingar hafi aðgang að faglegri og heiðarlegri blaðamennsku, á forsendum almannahagsmuna frekar en sérhagsmuna. Vegna sérreglna um fjölmiðla var yfirtakan tilkynnt til Samkeppniseftirlitsins, en í öðrum geirum er viðmið um þriggja milljarða veltu samrunaaðila. Þetta fyrirkomulagið kemur til vegna lýðræðislegs hlutverks fjölmiðla og til að vinna gegn samþjöppun valds.
Stuðlað að fjölbreytni og fjölræði
Mat Samkeppniseftirlitsins og Fjölmiðlanefndar var að yfirtaka Sameinaða útgáfufélagsins á miðlinum Mannlífi og tengdum eignum hefði ekki neikvæð áhrif.
Í mati Fjölmiðlanefndar kom fram að samruninn hefði ekki í för með sér „samþjöppun á fjölmiðlamarkaði sem áhrif hafi á fjölræði“ og tekur Samkeppniseftirlitið undir það í ákvörðun sinni.
„Mikilvægt sé að á íslenskum markaði séu öflugir og sjálfstæðir fjölmiðlar sem miðla fjölbreyttu efni“
Í ákvörðun Samkeppniseftirlitsins segir að „Fjölmiðlanefnd sé lögum samkvæmt ætlað að stuðla að fjölbreytni og fjölræði á íslenskum fjölmiðlamarkaði. Mikilvægt sé að á íslenskum markaði séu öflugir og sjálfstæðir fjölmiðlar sem miðla fjölbreyttu efni, þar sem ólíkum sjónarmiðum sé haldið á lofti. Að sama skapi sé mikilvægt að landsmönnum standi til boða vandað fréttaefni á íslensku þar sem leitast sé við að greina íslenskt samfélag og setja innlendar og erlendar fréttir í samhengi fyrir almenning hér á landi.“
Á þeim grunni er yfirtakan samþykkt án frekari athugunar. „Með vísan til alls framangreinds er það niðurstaða Fjölmiðlanefndar að kaup SÚ á stærstum hluta fjölmiðlareksturs Sólartúns hafi hvorki skaðleg áhrif á fjölræði né fjölbreytni í fjölmiðlun á þeim mörkuðum sem viðkomandi fjölmiðlaveitur starfa á,“ segir í ákvörðun Samkeppniseftirlitsins.
Ákvörðun hluthafa og stjórnar
Ákvörðun um yfirtöku á Mannlífi tók stjórn Sameinaða útgáfufélagsins, að fengnu umboði hluthafafundar félagsins 20. september síðastliðinn. Heimild til yfirtökunnar var síðan staðfest af hluthöfum félagsins 20. febrúar eftir að drög að samningi um yfirtökuna voru send á alla hluthafa félagsins. Eina skuldbinding félagsins í samningnum er yfirtaka kjarasamningsbundinna réttinda blaðamanna og hefðbundins rekstrarkostnaðar. Kaupverð var skilgreint ein króna, en sem fyrr segir eru báðir fyrrverandi eigendur Mannlífs hluthafar í Sameinaða útgáfufélaginu.
Nýr vefur Mannlífs var opnaður í febrúar. Hönnuður vefsins er Jón Ingi Stefánsson, hönnunarstjóri og einn af stofnendum Sameinaða útgáfufélagsins. Í nýrri hönnun er eldra merki Mannlífs endurvakið. Björgvin Ólafsson myndlistarmaður hannaði lógóið árið 1987 og prýddi það forsíður tímaritsins Mannlífs til 1998.
Með ritstjórn Mannlífs fyrst um sinn fer Jón Trausti Reynisson, sem sömuleiðis er einn af stofnendum útgáfufélagsins og er framkvæmdastjóri þess.
Valddreifing í samþykktum útgáfunnar
Sameinaða útgáfufélagið er í dreifðu eignarhaldi, þar sem valddreifing í samþykktum er ætlað að hindra yfirtökur og áhrif fjársterkra hagsmunaaðila. Félagið gefur einnig út Heimildina, Vísbendingu, Heimilisblaðið og ensk fréttabréf. Ritstjórnir og ritstjórnarstefnur miðla félagsins eru aðskildar.
Auglýsingasala fyrir Mannlíf fer í gegnum Birtingasöluna.
Einstaklingum og lögaðilum er boðið að styðja við fjölbreytni íslenskrar fjölmiðlunar með áskrifta- eða auglýsingakaupum.
Fyrirvari um hagsmuni: Í tilkynningunni er fjallað um málefni Mannlífs og útgáfufélags þess.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Athugasemdir