Dæmi eru um að hægt sé að spara allt upp í 70 prósent með því að sækja tannlæknaþjónustu í Ungverjalandi eða Póllandi, í stað þess að fá þá þjónustu á Íslandi.
Tannlæknaþjónusta á Íslandi kostar skildinginn, sérstaklega ef litið er til þess að hún á að teljast heilbrigðisþjónusta. Síðustu ár hafa mál þróast á þann veg að í dag er tannlæknaþjónusta sannarlega ekki á allra færi.
Það er engin nýlunda að Íslendingar kjósi að sækja sér tannlæknaþjónustu til Austur-Evrópu, en síðustu ár hefur það þó stóraukist. Þar ber hæst að fólk sæki Pólland og Ungverjaland heim í þeim tilgangi.
Ferðin fram og til baka, ásamt gistingu, auk tannlæknaþjónustunnar sjálfrar, er í mörgum tilfellum sögð ódýrari heldur en tannlæknaþjónustan ein og sér hér á landi.
Á Facebook eru nokkrir íslenskir hópar tileinkaðir einmitt þessu. Sumir eru umræðu- og fræðsluhópar um tannlæknaþjónustu erlendis, á meðan aðrir eru sérstaklega tileinkaðir ákveðnum tannlæknastofum þar ytra. Í þeim tilfellum eru stofurnar yfirleitt með íslenska tengiliði.
Athygli vekur að sumar þessara tannlæknastofa eru með heimasíður sínar þýddar á íslensku. Það gefur til kynna að ásóknin sé mikil og viðskipti Íslendinga við erlendar tannlæknastofur töluvert meiri en margir hafa hugmynd um.
Nú er jafnvel verið að selja hópferðir frá Íslandi til þessara staða, gagngert fyrir þá sem vilja sækja tannlæknaþjónustu hjá stofunum.
Þá má segja að um sé að ræða nokkurs konar pakkaferðir: flug fram og til baka, hótelgisting og tannlæknaþjónusta.
Dæmi um erlenda tannlæknastofu með stóran íslenskan kúnnahóp og heimasíðu þýdda á íslensku er Helvetic Clinics.
Í lýsingu efst á síðunni segir:
„Helvetic klíníkarnar ábyrgjast að veita hágæða tannlæknaþjónustu um leið og þú sparar 50 til 70% miðað við algeng verð tannlæknaþjónustu á Íslandi.“
Á síðunni segir að unnið sé eftir nákvæmum vinnureglum samkvæmt svissneskum stöðlum. Þar er einnig fullyrt að tannlæknastofur Helvetic Clinics séu búnar nýjustu tækni – sem sé of dýr fyrir tannlæknastofur á Íslandi.
Í heimasíðunni má finna verðskrá Helvetic Clinics. Verð er skráð í íslenskum krónum, en tekið er fram að verð sé fast í evrum, en hafi verið umreiknað í íslenskar krónur á genginu 149.
Í verðskránni er ekki einungis verð tannlæknastofunnar ungversku, heldur er verði sem er sagt íslenskt, stillt upp við hliðina. Samkvæmt stofunni er þar um að ræða algengt verð eða meðalverð fyrir sömu meðferðir á Íslandi.
Dæmi úr verðskránni:
Venjuleg fylling
Verð Helvetic Clinics: 6.705 kr.
Verð á Íslandi: 9.660 kr.
Sparnaður: 31%
Einfaldur tanndráttur
Verð Helvetic Clinics: 7.450 kr.
Verð á Íslandi: 17.940 kr.
Sparnaður: 58%
Þar sem ekki er hægt að treysta í blindni á verð sem erlenda stofan gefur upp sem verð á Íslandi, fór blaðamaður á stúfana og athugaði verð nokkurra innlendra tannlæknastofa.
Verð var svo borið saman við uppgefið verð Helvetic Clinics og einnar annarrar erlendrar stofu. Hún heitir Kreativ Dental og er, líkt og Helvetic Clinics, í Búdapest.
Tanndráttur
Helvetic Clinics: 7.450 kr.
Kreativ Dental: 7.504 kr.
Bora Bora Tannlæknar: 25.900 kr.
Tannlæknaþjónustan: 22.710 kr.
Heilartennur.is: 21.900 kr.
Tannlæknastofan Valhöll: 23.770-25.200 kr.
Brostu Tannlæknastofa: 20.600-22.200 kr.
Meðalverð íslensku stofanna miðað við lægsta uppgefna verð: 22.976 kr.
Meðalverð íslensku stofanna miðað við hæsta uppgefna verð: 23.582 kr.
Tanndráttur í skurðaðgerð
Helvetic Clinics: 20.115 kr.
Kreativ Dental: 22.513 kr.
Bora Bora Tannlæknar: 39.500 kr.
Tannlæknaþjónustan: 46.150-81.330 kr.
Heilartennur.is: 34.600 kr.
Tannlæknastofan Valhöll: 33.200-60.370 kr.
Brostu Tannlæknastofa: 32.300-39.300 kr.
Meðalverð íslensku stofanna miðað við lægsta uppgefna verð: 37.150 kr.
Meðalverð íslensku stofanna miðað við hæsta uppgefna verð: 51.020 kr.
Fylling
Helvetic Clinics: 6.705 kr.
Kreativ Dental: 11.256 kr.
Bora Bora Tannlæknar: 7.900 kr.
Tannlæknaþjónustan: 8.540 kr.
Heilartennur.is: 7.400 kr.
Tannlæknastofan Valhöll: 7.840 kr.
Brostu Tannlæknastofa: 6.900-7.200 kr.
Meðalverð íslensku stofanna miðað við lægsta uppgefna verð: 7.716 kr.
Meðalverð íslensku stofanna miðað við hæsta uppgefna verð: 7.776 kr.
Gervitennur
Helvetic Clinics: 74.500 kr. fyrir annaðhvort efri eða neðri.
Fyrir báða góma því líklega: 149.000 kr.
Kreativ Dental: 75.045 kr. fyrir annaðhvort efri eða neðri.
Fyrir báða góma því líklega: 150.090 kr.
Bora Bora Tannlæknar: 385.000 kr.
Tannlæknaþjónustan: 412.490 kr.
Heilartennur.is: 376.700 kr.
Tannlæknastofan Valhöll: 380.000-400.000 kr.
Brostu Tannlæknastofa (Ath.: tannsmíði ekki innifalin): 277.000 kr.
Meðalverð íslensku stofanna miðað við lægsta uppgefna verð: 366.238 kr.
Meðalverð íslensku stofanna miðað við hæsta uppgefna verð: 370.238 kr.
Rótarholsaðgerð/meðhöndlun tannrótarganga – ein göng
Helvetic Clinics: 24.585 kr.
Kreativ Dental: 24.832 kr.
Bora Bora Tannlæknar: 27.900 kr.
Tannlæknaþjónustan: 27.960 kr.
Heilartennur.is: 22.400 kr.
Tannlæknastofan Valhöll: 19.920-30.340 kr.
Brostu Tannlæknastofa: 19.000-25.500 kr.
Meðalverð íslensku stofanna miðað við lægsta uppgefna verð: 23.436 kr.
Meðalverð íslensku stofanna miðað við hæsta uppgefna verð: 26.820 kr.
Á dæmunum má sjá að í sumum tilfellum má spara háar fjárhæðir með því að sækja tannlæknaþjónustu erlendis, til að mynda í Búdapest. Ótal Íslendingar, sem hafa ýmist gert þetta einu sinni eða margoft, bera stofunum góða söguna og skarta sínu fínasta brosi eftir heimsóknirnar. Slíkar ferðir má svo auðvitað líka nýta sem verslunarferðir, í jólagjafainnkaup eða hvað eina annað, enda er yfirleitt hagstætt fyrir Íslendinga að versla í löndum á borð við Ungverjaland og Pólland.
Tekið skal fram að allar tölur eru birtar með fyrirvara, enda eru verðskrár erlendu stofanna ekki endilega með sama orðalag og eins uppsetta verðskrá og þær íslensku. Blaðamaður hefur sjálfur ekki reynslu af stofunum og getur því ekki vitnað eða fullyrt um þjónustustig, fagmennsku og gæði aðgerða. Á það bæði við um erlendu stofurnar og þær íslensku sem tilgreindar eru.
Athugasemdir