Ungur maður réðst á öryggisvörð í Hagkaup í Spönginni í Grafarvogi í nótt. Ástæða árásarinnar var sú að maðurinn vildi ekki setja upp grímu líkt og öryggisvörðurinn bað hann um að gera og var manninum því vísað út, sem brást þá ókvæða við.
Ásdís nokkur skrifar inn í hóp Grafarvogsbúa á Facebook:
„Ef þú ert mögulega foreldri ungra stráka 15-17/18 ára, sem fóru saman í Spöngina í kvöld átta til tíu saman, flestir í svörtum gallabuxum og svörtum úlpum einn í hettupeysu sem var camo munstruð, einn í blárri hettupeysu, tveir strákarnir með mjög aflitað hár, mæli ég með að þú talar við barnið þitt og spyrjir út í kvöldið. Þá sérstaklega ef þú átt strák með aflitað hár og að öllum líkindum með skurð á hendinni.“
Sjá einnig: 14 ára barn réðst á afgreiðslufólk í Hagkaup: „Ég var ekki tilbúinn að sleppa honum“
Segir Ásdís ástæðan fyrir skrifum sínum vera sú að önnur fólskuleg árás hafi átt sér stað í Hagkaup, en einn úr þessum hópi hafi kastað bjórflösku í andlitið á öryggisverði, sem endaði alblóðugur.
„Ég sá svo allan hópinn stinga af saman í átt að borgó og voru þeir því farnir þegar lögreglan kom.“
Þá segist Ásdís vilja hvetja alla foreldra sem mögulega eiga drengi úr þessum hópi til að tala við þá í von um að þeir vilji gefa sig fram. „Því að þeir voru alls ekki allir til í þetta og vildu bara fara þegar það var verið að vísa þessum eina út. Ég get ímyndað mér að þetta sitji aðeins í einhverjum þeirra. Og sömuleiðis fyrir alla foreldra að taka spjallið við unglingana í hverfinu um afleiðingar svona grófs ofbeldis, þetta er algjörlega farið úr böndunum.“
Samkvæmt lögreglu er mannsins enn leitað, en gert er ráð fyrir að lögreglan fái myndefni úr öryggismyndavélum afhentar eftir helgi í síðasta lagi og það muni hjálpa til við að upplýsa málið.
Athugasemdir