Þegar aðeins tvær vikur eru til jóla hafa sóttvarnaryfirvöld á kanaríeyjunum Gran Canaria og Tenerife ákveðið að herða sóttvarnaraðgerðir vegna Covid-19. Yfir hátíðirnar er von á þúsundum Íslendinga til eyjanna til að njóta jólasólar.
Undanfarið hefur verið nokkur aukning í smitum á eyjunum tveimur. Svo mjög að yfirvöld hafa fært aðgerðir upp á hættustig 2. Í gær greindust 273 smitaðir á Tenerife og 197 á Gran Canaria, eða Kanarí eins og eyjan er stundum kölluð hérlendis. Alls eru 6.876 virk Covid-smit á öllum eyjunum í kanaríeyjaklasanum. Í gær létust þrír vegna veirunnar.
Raunar eru smittölurnar svo háar á eyjunum að búist er við því að innan tíðar komi sóttvarnaryfirvöld til með að hækka varnirnar upp í hættustig 3, af fjórum stigum mögulegum. Hvort sú verði raunin kemur væntanlega í ljós næstkomandi föstudag þegar yfirvöld tilkynna sóttvarnaráætlun sína.
Samkvæmt hinu nýja stigi, sem tók gildi 10. desember og mun gilda til 10. janúar næstkomandi, kom til framkvæmdar skerðing á þeim gestafjölda sem hótelin mega hafa hjá sér hverju sinni. Hið sama má segja um veitingastaði sem nú mega aðeins taka á móti helmingi gesta sem áður var og hópar mega ekki vera stærri en 8 manns. Undanþága er veitt fyrir fjölmennari atburði, sé sýnt fram á neikvætt covid-próf fyrir atburð.
Aðrar reglur sem gilda á hættustigi 2 á Gran Canaria og Tenerife yfir hátíðirnar:
- Bannað er að dansa en karaoke er leyft ef söngvararnir eru með grímu á meðan sungið er og míkrófónn sprittaður á milli söngvara.
- Utandyra er ekki grímuskylda, ef hægt er að viðhalda 1,5 metrum milli fólks. Grímuskylda er hins vegar til dæmis í verslunum, almenningssamgöngum og þegar farið er á salerni veitingastaða.
- Sektir eru við því að hafa ekki grímu tiltæka á sér öllum stundum.
Athugasemdir