Litla ljót er ekki um Bergþóru: „Ljót saga um illa meðferð á varnarlausum“

Steinunn Ólína Þor­steins­dóttir segir ljóðið Litla ljót ekki fjalla um Bergþóru Ein­ars­dóttur sem hefur sakað Megas og Gunnar Örn Jónsson um að hafa nauðgað sér.

Sjá einnig: Textinn Litla ljót eftir Megas: „Liggðu flöt og krepptu hné, glenntu þig svo sem gleið­ust sé“

Segir Steinunn að ljóðið byggi á karakter eftir Guðberg Bergsson sem hún lék eitt sinn á sviði.

„Alls­herjar og mennta­mála­nefnd er á villi­götum ef þetta eru raun­veru­legar vanga­veltur, að svipta eigi Megas heið­urs­launum.

Mig langar að benda á að við­bjóðs­ljóðið umrædda, Litla ljót, er byggt á karakter eftir Guðberg Bergsson sem ég fékk að leika í leik­gerð­inni, Sannar Sögur af sál­ar­lífi systra, sem unnið var upp úr Tanga­bókum Guðbergs, frum­sýnt ‘94 .Karakt­er­inn heitir Dídí, hún er hölt, mis­þroska, ljót og miskun­ar­lausir karlar sífellt að ,,sprauta” í hana. Ljót saga um illa með­ferð á varn­ar­lausum.“

Segist Steinunn ekki draga í efa van­líðan Bergþóru en að ljóðið sé þó ekki um hana.

„Ég dreg ekki í efa van­líðan þá sem Bergþóra lýsir að sam­skipti hennar við Megas og Gunna súkkat hafi haft í för með sér en ljóð Megasar um Litlu ljót er EKKI um Bergþóru. Annað sem er næsta víst er að kveð­skapur Megasar mun lifa okkur öll hvort sem okkur líkar betur eða verr.“

Í sam­tali við blaða­mann Vísis, seg­ist Steinunn Ólína ekki hafa ætlað sér að tjá sig um þetta mál en hafi svo skipt um skoðun. „Og ég ætla ekki að tjá mig frekar um þetta mál. Þetta er verk­efni fyrir bók­mennta­fræð­inga fram­tíð­ar­innar sem munu fást við verk Megasar löngu eftir að við öll erum dauð.“