Anna Kristjánsdóttir gagnrýndi, í pistli á Facebook, málþóf þingmanna úr stjórnarandstöðunni á frumvarpi um breytingar á veiðigjöldum.

„Nei mín kæru, ég er ekki að tala um 5. þingmann suðvesturkjördæmis sem að auki hefur lýst því yfir að hún sé á móti málþófi og megi hún eiga heiður skilinn fyrir þá skoðun sína. Ég er nefnilega líka á móti málþófi og finnst það lýsa vantrausti á Alþingi Íslendinga,“ segir Anna í pistlinum sínum. Þessi þingmaður er Bryndís Haraldsdóttir, stjórnmálakona Sjálfstæðisflokksins en hún heldur sína 42. ræðu um veiðigjaldið á Alþingi í dag.

Anna heiðrar Ingibjörgu Davíðsdóttur, þingmann Miðflokksins, með titlinum Málþófsdrottningin. „Málþófsdrottningin hefur flutt flestar ræðurnar í málþófinu um Bókun 35 auk þess sem hún hefur flutt 50 ræður í málþófinu um veiðigjöldin. Sá alþingismaður er 4. þingmaður norðvesturkjördæmis, en skammt á eftir henni er 8. þingmaður norðausturkjördæmis, síðan 1. þingmaður norðvesturkjördæmi en allir þessir þingmenn hafa flutt yfir 40 ræður í málþófinu um veiðigjöldin og ekki hættir enn þegar þessi orð eru rituð,“ skrifar Anna Kristjánsdóttir. 8. þingmaður Norðvesturkjördæmis sem Anna ræðir er flokksmeðlimur Ingibjargar, Þorgrímur Sigmundsson úr Miðflokknum en 1. þingmaður Norðvesturkjördæmis er Ólafur Adolfsson úr Sjálfstæðisflokknum.

Málþóf stjórnarandstöðunnar á frumvarpi um breytt veiðgjöld hefur orðið til þess að umræðan er nú sú þriðja lengsta með 127 klukkustundir. Metið er 147 klukkustundir en það er umræðan um þriðja orkupakkann árið 2019 sem varð svo löng að reglum Alþingis var breytt til þess að draga úr getu stjórnarandstöðu til að stöðva þing.

„Mikið svakalega held ég að viðkomandi þingmenn hafi gaman af að hlusta á sjálfa sig,“ skrifar Anna Kristjánsdóttir.