Atli Þór Fanndal Guðlaugsson, verkefnastjóri hjá Rannsóknasetri skapandi greina við Háskólann á Bifröst, gagnrýnir Snorra Másson, þingmann Miðflokksins, harðlega í færslu sem hann birti á Facebook í kjölfar Kastljóssþáttar sem sýndur var í gærkvöldi en þar tókust þau Snorri og Þorbjörg Þorvaldsdóttir, verkefnastjóri hjá Samtökunum 78 um bakslag í réttindabaráttu hinsegin fólks.

„Mikið ofboðslega er trist að horfa á þingmann sem ræður bara ekki við þá hugsun að hann geti haft rangt fyrir sér,“ skrifar Atli Þór. Hann segir Snorra skorta tilfinningagreind til að skilja að hann einn skilgreini ekki áhrif og afleiðingar orða sinna og að hann upplifi rökræðu sem árás á sig.

Atli Þór lýsir því einnig að Snorri kunni ekki að ræða afleiðingar orða sinna vegna þess að honum „finnist hann drifinn áfram af sannleiksást“. „Það sem er ágætt er að sjá lítinn óöruggan pjakk sem hefur ekkert annað fram að færa sem stjórnmálamaður en að áskilja sér þann rétt að vera ekki sakaður um fordóma vegna þess sem hann segir, gerir og boðar,“ skrifar hann og bætir við að slíkt viðhorf sýni óskilning á ábyrgð og gagnrýni.

Hann gagnrýnir jafnframt það sem hann kallar „algjöra kröfu um aðdáun“ og segir Snorra réttlæta eigin gjörðir án tillits til áhrifa þeirra á aðra. „Svona fólki treystir maður ekki fyrir neinu. Og aldrei fyrir velferð annarra,“ skrifar Atli Þór í lokin.