Siðanefnd Blaðamannafélags Íslands hefur vísað frá kæru á hendur Ágústi Sverrissyni, fréttastjóra DV, fyrir frétt sem hann skrifaði í lok janúar á þessu ári.
Ágúst hafði skrifað frétt þar sem var fjallað um byggingarfyrirtæki á Selfossi og nefnist greinin Varað við fjölskyldufyrirtæki á Selfossi – „Þetta eru svik og stuldur, ekkert annað“
Axel Kjartan Baldursson, sem er einn af eigendum fyrirtækisins, var kærandi í málinu en hann taldi DV fara með ósannindi í fréttinni. „Tilgreind mál sé frá árinu 2024 og séu öll frágengin með endurgreiðslum. Málið hafi því „skemmandi afleiðingar fyrir fyrirtækið Byggjum Saman.“ Kærandi segist hafa sent blaðamanni tölvupóst en ekki fengið svar.“
Taldi Axel fréttina varða við 6. grein siðareglna og „eflaust fleiri.“
Úrskurður nefndarinnar
Í málsmeðferðarreglum siðanefndar og sérstöku kærublaði sem kærendur fylla út kemur skýrt fram hvað þurfi að liggja fyrir svo kæra geti verið tekin til umfjöllunar. Kærandi þarf að hafa leitað leiðréttingar hjá viðkomandi miðli. Hann þarf að vera aðili máls eða hafa ríkra hagsmuna að gæta. Kæruefnið skal vera afmarkað með augljósum hætti og hin kærða umfjöllun skal fylgja með kærunni. Kæran þarf að berast innan tveggja mánaða frá birtingu efnisins. Umrædd frétt birtist á dv.is laugardaginn 31.01.2026 kl 9:00. Kæran barst BÍ þremur klukkustundum síðar eða kl 12:17.
Ljóst er að ekki hafði reynt á leiðréttingarkröfuna á þeim tíma og ekki kemur fram hvað fólst í þeim tölvupósti. Hin kærða umfjöllun fylgir ekki kærunni, einungis skjáskot af fyrirsögn. Kæran er óljós og ekki hægt að segja að kæruefnið sé afmarkað með augljósum hætti eins og áskilið er í málsmeðferðarreglum siðanefndar. Siðanefnd telur kæranda ekki fullnægja málsmeðferðarreglur við meðferð kæra vegna meintra brota á Siðareglum Blaðamannafélags Íslands og því beri að vísa málinu frá að svo stöddu.
6. grein siðareglna
Blaðamaður gerir greinarmun á staðreyndum og skoðunum, gengur úr skugga um áreiðanleika upplýsinga og gætir þess að umfjöllunin sé hlutlæg.
