Reykjavíkurborg biðlar til borgarbúa að gefa ekki öndunum í tjörninni við ráðhús borgarinnar brauð. Ástæðan er sú að litrík brák hefur myndast í tjörninni.

Samkvæmt borginni myndaðist brákin vegna þess að ákveðnir blágrænir þörungar eða gerlar fjölga sér of hratt og mynda blóma, sem byrjar sem grugg en endar sem skán sem flýtur ofan á vatninu. Þess er óskað að á meðan þessu stendur, gefi fólk alls ekki öndunum brauð þar sem ekki er skynsamlegt að bæta við meira magni af lífrænum efnum út í Tjörnina.

„Fyrirbærið kallast ofauðgun og gerist vegna þess að magn næringarefna verður of mikið. Um er að ræða þekkt ástand í stöðuvötnum á sumrin en er ekki ákjósanlegt. Líkurnar á þessu eru sérstaklega miklar þegar hitastig vatnsins hækkar á hlýjum og sólríkum dögum og þegar vatnsblöndun er lítil vegna hægs rennslis,“ segir í tilkynningu frá borginni.

Þá segir borgin að sterk lykt geti verið af brákinni. Hún er ekki talin hættuleg en fólki er ráðlagt að vera ekki að snerta hana að óþörfu.