Dóra Björt Guðjónsdóttir, borgarfulltrúi Samfylkingarinnar, er allt annað en sátt með fréttaflutning DV og Morgunblaðsins en miðlarnir fjölluðu báðir um færslu sem Þröstur Ingólfur Víðisson, fyrrverandi eftirlitsmaður við vetrarþjónustu Reykjavíkurborgar, setti fram.

Í henni heldur Þröstur því fram að Reykjavíkurborg hafi valdið fjölda fólks alvarlegu líkams- og heilsutjóni, auk gríðarlegs fjárhagstjóns. Ástæðan er sú að á þriðjudag leituðu tæplega 100 manns á bráðamóttökuna vegna hálkuslysa. Telur Þröstur að þetta sé afleiðing breytinga sem gerðar voru fyrir þremur árum og nefnir í pistlinum sínum að Dóra hafi gortað sig af breytingunum.

Borgarfulltrúinn bendir hins vegar á að hún hafi verið í fæðingarorlofi þegar vinna við breytingarnar fór fram.

„Nýverið hafa verið settar fram ásakanir á hendur mér persónulega, meðal annars í Facebook-pistli sem síðar var endurbirtur af DV (og nú MBL líka) gagnrýnislaust, án þess að nokkur tilraun sé gerð til að sannreyna staðreyndir. Þar eru mér gerðar upp ákvarðanir og vinna við vetrarþjónustuhandbók Reykjavíkur sem ég einfaldlega kom ekki að þar sem ég var í fæðingarorlofi þegar vinnan fór fram. Burtséð frá inntaki gagnrýninnar þá er lágmarkskrafa að farið sé rétt með einfaldar staðreyndir, hvað þá þegar þær draga dilk á eftir sér fyrir fólk,“ skrifar Dóra um málið.

„Ég tel mikilvægt að gagnrýni í opinberri umræðu byggi á réttum forsendum. Ég tek ábyrgð á þeim verkefnum og ákvörðunum sem ég hef sjálf komið að og er tilbúin að ræða þau af hreinskilni. Það sem er hins vegar óásættanlegt er að vera ítrekað gerð ábyrg fyrir ákvörðunum og verkum sem ég kom ekki að og þurfa stöðugt að verja mig gegn rangfærslum og ósönnum ásökunum,“ heldur borgarfulltrúi áfram og upplýsir að henni hafi verið hótað.

Áreiti og hótanir

„Annað dæmi er hið svokallaða „Græna gímald“. Ég sat ekki í skipulagsráði þegar það skipulag var samþykkt, ekki á nokkrum tímapunkti. Hvað þá sem formaður. Samt hef ég í á annað ár þurft að þola stanslaust áreiti – og jafnvel hótanir – vegna máls sem ég bar enga ábyrgð á. Slíkt er ekki aðeins ósanngjarnt heldur alvarlegt mál í lýðræðislegri umræðu,“ og tekur Dóra fram að hún vinni af heilindum, fagmennsku og með einlægan vilja til að gera hlutina vel.

„Ég er alltaf reiðubúin að ræða hvað megi betur fara. En ég er orðin þreytt á því að sitja undir níði og persónulegum árásum sem byggja á fullkomnum rangfærslum. Dæmið mig af verkum mínum. Ekki af einhverju sem ég kom hvergi nærri,“ skrifar hún að lokum.