Sjálfstæðisflokkurinn hefur hafið kosningabaráttu sína fyrir komandi sveitarstjórnarkosningar í Reykjavík.

Fyrir stuttu birti flokkurinn myndband á samfélagsmiðlum eins og TikTok og Instagram þar sem lagið Like That með Future, Metro Boomin & Kendrick Lamar er spilað undir myndefni af Reykjavík og Hildi Björnsdóttur, oddvita Sjálfstæðisflokksins í Reykjavík, í jákvæðu ljósi. Á einum tímapunkti í myndbandinu birtast Einar Þorsteinsson, Pétur Marteinsson og Ari Edwald og er það tímasett við kafla í laginu þar sem þeim er sagt að „fokka sér.“

Mennirnir þrír eiga það sameiginlegt að vera allir fyrrverandi meðlimir Sjálfstæðisflokksins en þeir hafa nú sagt skilið við flokkinn og leitað í faðm annarra flokka. Vísar nafn myndbandsins „Varist eftirlíkingar“ í þá staðreynd.

Ekki er búið að gefa út hverjir muni skipa lista Sjálfstæðisflokksins í kosningum fyrir utan að Hildur verður oddviti en hatrammar deilur hafa verið innan borgarstjórnarflokksins um völd.