Í dagbók lögreglu frá því í gærkvöldi og í nótt er greint frá því að tilkynnt hafi verið um mann í annarlegu ástandi á veitingastað í miðborginni sem gerði sig líklegan til þess að girða niður buxurnar fyrir framan aðra gesti og veitast að starfsmönnum. Hann var verulega ölvaður og var handtekinn vegna málsins.

Tilkynnt var um annan mann í miðborginni beran að ofan að öskra út í loftið í annarlegu ástandi. Vitni sagði hann hafa öskrað á fólk og barið í rúður veitingastaðar. Aðilinn brást illa við afskiptum lögreglu en hann var handtekinn á vettvangi sökum ástands hans. Hann sagðist vera búinn að drekka einn líter af vodka. Aðilinn hrækti á fatnað lögreglumanns. Hann var í kjölfarið vistaður í klefa.

Starfsmenn sundlaugar í Reykjavík óskuðu aðstoðar við að vísa pari úr lauginni sem neituðu að fara þar sem konan væri ölvuð. Konan og karlinn voru æst út í einn starfsmann laugarinnar og var konan að hóta starfsmanninum líkamsmeiðingum að viðstaddri lögreglu þegar parið var á leiðinni í burtu frá sundlauginni. Konan var að lokum handtekinn þegar hún neitaði að róa sig niður og fara í burtu að beiðni lögreglu. Hún var flutt á lögreglustöð en látin laus að skýrslutöku lokinni.

Tilkynnt var um 15 ára börn í annarlegu ástandi með áfengi við grunnskóla í Reykjavík. Haft var uppi á krökkunum í nærliggjandi götu þar sem nokkur af þeim voru verulega ölvuð. Þeim var komið heim til foreldra. Ekki liggur fyrir við hvaða grunnskóla börnin voru

Lögreglan fékk tilkynningu um yfirstandandi innbrot í fyrirtæki í Hafnarfirði. Gerendur voru ennþá inni í húsinu þegar lögregla kom og hlupu síðan í burtu. Báðir gerendur fundust við leit í hverfinu og voru þeir vistaðir í klefa vegna málsins.