Edda Björgvinsdóttir opinberar nafn nýjasta karakters síns, fullu gömlu konuna sem slegið hefur í gegn á samfélagsmiðlum undanfarið.

Mannlíf heyrði í Eddu vegna þeirra gríðarlegu vinsælda sem grínmyndbönd hennar hafa notið undanfarið en þau hefur Edda birt á Facebook. Þar notast hún við filter til þess að gera sig eldri og gerir stólpagrín að stjórnmálamönnum og milljarðamæringum Íslands. Hugmyndina fékk hún hjá syni sínum.

„Ég hef eiginlega ekki hugmynd um af hverju Guðríður gamla fellur svona vel í kramið hjá þjóðinni! Þetta byrjaði með því að ég var að skoða myndbönd hjá yngri syni mínum sem sá eldri sendi honum og þar notaði Björgvin filter á snapchat og sendi kveðju yfir hafið frá ömmu alka á Íslandi. Ég fékk svo mörg hlátursköst að ég stal hugmyndinni frá Björgvin og sagði honum að ég ætlaði að henda þessari kerlingu út á netið.“ Þannig hljómar skriflegt svar Eddu til Mannlífs sem spurði hana út í hinar gríðarmiklu vinsældir og hvort nafn sé komið á karakterinn.

Aðspurð hvort hún hyggist gera fleiri myndbönd svarar Edda:

„Þegar manni eru færðar stórgjafir eins og stóra tappa málið á Alþingi og grátkór milljarðamæringa í sjávarútvegi þá verður grínpúkinn í mér stjórnlaus og byrjar að fikta í allskonar upptöku öppum  og senda í allar áttir! Ég veit ekkert hvort Guðríður og Gyða halda áfram að heimsækja netið - hver veit.“

Hér fyrir neðan má sjá nýjast myndskeið Eddu, þar sem Guðríður hágrætur vegna aðfararinnar gegn útgerðinni.