Kristinn ehf., fjárfestingarfélag í meirihlutaeigu Guðbjargar Matthíasdóttur, skilaði 96 milljóna króna tapi árið 2024, en árið áður hafði félagið verið með 426 milljóna króna hagnað. Viðskiptablaðið greindi frá þessu.

Samstæða Kristins velti 17,2 milljörðum króna á árinu 2024, lítillega meira en árið áður þegar veltan nam 17,1 milljarði. Til samstæðunnar heyra meðal annars Myllan-Ora, Fastus og félög sem halda utan um fasteignir á Korputorgi og Höfðabakka. Þá á Kristinn rúman þriðjungshlut í móðurfélagi Domino’s.

Guðbjörg hefur lengi verið ein af ríkustu manneskjum Íslands en hún var með 193.861.940 krónur í heildartekjur árið 2024. Var hún í 171. sæti á Hátekjulista Heimildarinnar.