Fjögurra ára gamall drengur var fluttur með hraði á sjúkrahús eftir að hafa orðið fyrir hundabiti á Norð-Vestur Englandi. Hann hlaut áverka á fæti og í andliti.

Lögreglan hefur beðið almenning um að láta í té upptökur úr öryggismyndavélum sem gætu hafa náð atvikinu, en tveir hundar voru teknir í varðhald í kjölfar árásarinnar. Í yfirlýsingu segir lögreglan:

„Við leitum upplýsinga og upptaka í kjölfar þess að barn hlaut hundabit. Um er að ræða fjögurra ára dreng sem var fluttur á sjúkrahús með áverka á fæti og andliti. Sem betur fer eru meiðslin ekki lífshættuleg. Tveir hundar hafa verið teknir í varðhald, annars vegar hundur af tegundinni Staffordshire Bull Terrier og hins vegar Pocket Bully. Eigandi hundanna hefur verið auðkenndur og mun verða yfirheyrður síðar.“

Lögreglan í Hyndburn reyndi að róa íbúa eftir árásina sem átti sér stað í bænum Oswaldtwistle í Lancaskíri síðdegis á mánudag.

„Við skiljum að þetta geti valdið áhyggjum, en við viljum fullvissa ykkur um að rannsókn stendur yfir og biðjum ykkur að aðstoða við hana,“ segir í yfirlýsingu lögreglunnar. „Við höfum sérstakan áhuga á upptökum úr öryggismyndavélum sem kunna að hafa fangað árásina.“

Atvikið á sér stað aðeins nokkrum vikum eftir að tveggja og þriggja ára börn slösuðust alvarlega eftir árás hunds inni á heimili í Liverpool. Atvikið átti sér stað á Johnson Avenue í Prescot þann 1. maí. Tvö smábörn og 18 ára kona voru bitin, og börnin flutt á sjúkrahús með alvarlega áverka á höndum og fótum.

Að minnsta kosti tveir sjúkrabílar og tveir lögreglubílar voru sendir á vettvang. Hundurinn sem réðst á börnin var fjarlægður af heimilinu.
Rannsóknarlögreglumaðurinn Phil Thompson sagði á þeim tíma:

„Þetta er skelfilegt atvik þar sem tvö smábörn hafa verið flutt á sjúkrahús með alvarlega áverka á höndum og fótleggjum. Ef einhver hefur upplýsingar sem gætu hjálpað rannsókn okkar, þá biðjum við viðkomandi að hafa tafarlaust samband.“

Bætti hann við: „Rannsóknin er enn á frumstigi. Hundurinn hefur verið tekinn í hald og unnið er að því að greina tegund hans og hver eigandi hans er.“